Pas Partisë Socialiste që lidhi aleancë me 21 parti, një tjetër koalicion ka dorëzuar ditën e sotme kërkesën në Komisionin Qendror të Zgjedhjeve.
Mësohet se koalicioni i 7 partive të vogla me emrin “Shpresa për Ndryshimin” është regjistruar në KQZ për të garuar përballë mazhorancës.
7 partitë, ish-aleate të Bashës, që kanë lidhur koalicion janë Aleanca Kuq e Zi, Bashkimi Liberal Demokrat, Demokracia e Re Europiane, Aleanca Popullore, Partia Balli Kombëtar, Partia Emigracioni Shqiptar dhe Partia Ora e Shqipërisë.
“Të vetëdijshëm se rruga e vetme kushtetuese për përtëritjen dhe zhvillimin e një shoqërie demokratike është pjesëmarrja në proceset e saj zgjedhorë, të shqetësuar se rrethanat politike të tanishme në Shqipëri po ndikojnë për krijimin e një klime mosbesimi në vlerat e institucioneve demokratikë,
Ne si një grup i partive politike opozitare kemi vendosur së bashku për të marrë pjesë në zgjedhjet e ardhshme vendore si koalicion me emërtimin ‘Shpresa për Ndryshimin’.
Nëpërmjet kësaj letre, partitë politike iu drejtuan Komisionit Qendror të Zgjedhjeve për regjistrimin e tyre si koalicion në zgjedhjet e ardhshme vendore” – thuhet në kërkesën e partive.
Ky është koalicioni kundërshtar apo opozitar që regjistrohet në KQZ për zgjedhjet e 30 qershorit dhe do të garojë përballë maxhorancës së drejtuar nga kryeministri Edi Rama për 12 bashki të vendit.
