Ditën e sotme, Gjykata e Shkallës së Parë pranë Rrethit Gjyqësor, Elbasan pranoi kërkesën e kandidatit që fitoi bashkinë e Librazhdit në zgjedhjet e 30 qershorit. Kastriot Gurra është rikonfirmuar në krye të kësaj bashkie.
Në vendimin e sotëm të Gjykatës së Elbasanit citohet se nuk ka asnjë ankimim mbi tabelën zyrtare të shpallur nga KQZ mbi rezultatin e zgjedhjeve. Në këtë vendim shtohet se ky mandat është fituar në mënyrë të ligjshme.
Kujtojmë këtu se edhe ditën e djeshme është po e njëjta gjykatë që vendosi të njëjtën gjë edhe për bashkinë e Elbasanit. Në krye të kësaj bashkie u konfirmua Gledian Llatja.
Gurra ishte kandidat i vetëm në zgjedhjet e 30 qershorit pasi nuk kishte asnjë rival përballë.
