Zëvendësministri grek, tek varrezat në Këlcyrë dhe Bularat, kujtohet edhe Katsifasi

Google+ Pinterest LinkedIn Tumblr +

Në varrezat e ushtarëve grekë në Këlcyrë dhe në  Bularat, me rastin e Festës “Jo” të Greqisë, u mbajtën sot homazhe nga zyrtarë të qeverisë greke. Mes tyre ishin  Zv.ministri i Jashtëm grek, Kostandinos Vllasis, në krah të tij qëndronte një gjeneral, nuk mungonin as kryetari i PBDNJ, Vangjel Dule dhe ish-deputeti i LSI-së, Vangjel Tavo.

Vllasis shprehu mbështetje ndaj minoritetit grek në jug të Shqipërisë.

“Është e vështirë të gjesh fjalë për të përshkruar ndjenjat kur viziton këtë vend të shenjtë. Gjendem këtu në Këlcyrën e lavdishme duke përfaqësuar qeverinë greke dhe kryeministrin Qirjako Micotaqi për t’ju përcjellë një mesazh të rëndësishëm mbështetjeje dhe dashurie, për t’ju kujtuar se nuk jeni vetëm. Këtu ushtarët tanë në 1941 kanë zhvilluar një nga betejat më të përgjakshme. Ishin njerëz të thjeshtë që pa u menduar dy herë dhanë jetën për lirinë e atdheut. Të jeni krenarë që jetoni në këtë dhe heronjsh, si mbrojtës të vlerave dhe trashëgimisë së atdheut tonë”, tha Vlasis.

Ndërsa kreu i PBDNJ, Vangjel Dule ka kërkuar zbardhjen e vrasjes së Kostandino Kacifas.

“Kjo është një kërkesë e vetëkuptueshme që presupuzohet që jepet për këdo dhe në çdo rast, është kërkesë e Parlamentit Europian dhe një kërkesë morale dhe humane. Duhet që sa më parë të përmbyllen procedurat dhe të jepet një përgjigje e qartë dhe e vërtetë”, tha Dule.

Një grup i vogël nga shoqatat patriotike demonstruan me flamurin kombëtar dhe të UCK-së tek “Ura e Leklit” teksa kalonte eskorta e zv/ministrit grek.  Gjatë ceremonisë pati një incident të vogël, ku vajzës që mbante flamurin shqiptar i ra të fikët.

Ngritja e varrezave të ushtarëve grekë është pjesë e strategjisë grekë për të mbajtur gjallë ndjenjat shoviniste për Vorioepirin.

Komuniteti çam që është dëbuar i ka kërkuar qeverisë të ndërhyjë për një memorial të të rënëve në Çamëri, por pala greke refuzon të flasë për këtë çështje.

/GazetaReforma.com/

Shpërndaje
Share.

Komento