Qeveria shqiptare e drejtuar nga kryeministri Edi Rama ka kaluar në delir në fund të mandatit të saj të dytë dhe me çdo kusht po kërkon edhe të tretin.
Nuk ka njeri dhe organizëm ndërkombëtare në botë që ja mush mendjen kësaj qeverie që nuk është e suksesshme, apo që ka qeverisur në mënyrën më dështuar vendin që tashmë duhet të ishte një anëtar i BE-së.
Qeveria dhe kryeministri Rama aq me të madhe e propagandojnë suksesin në qeverisje dhe arritjet e shumta, sa janë gati që pjesë të propagandës, censurës, apo shtrembërimeve të bëjnë edhe deklaratat e ndërkombëtarëve.
Ky zell i tepruar për lavdërime dhe lajka është shprehur dje edhe nga Agjencia Shtetëror e Lajmeve “ATSH”, e cila nëpërmjet një lajmi, ka guxuar që të nxjerrë nga konteksti dhe të shtrembërojë edhe deklaratat e Ambasadores Amerikane në Shqipëri, Yuri Kim, sikur kjo e fundit i ka thurur lavde dhe ka ngritur lartë punën e qeverisë.
Por ndryshe nga diplomatë të tjerë që më parë “ulnin kokën” përpara lojërave të qeverisë të kapur prej dhuratave, qokave, ndereve apo favoreve, Ambasadorja Amerikane i ka plasur “bombën në dorë” qeverisë dhe ATSH-së, e cila është bërë qesharake dhe fiks një media “Kazan”, siç i quan kryeministri Rama, portalet që janë kundër tij.
Dje një seri mediesh pranë qeverisë, përfshi këtu edhe Agjencinë Telegrafike Shqiptare, raportuan një ditë më parë se gjatë konferencës për prezantimin e rezultateve të raportit të Grupit të Shteteve Kundër Korrupsionit (GRECO) për Shqipërinë, ambasadorja amerikane në Tiranë, Kim, është shprehur se, “qeveria po punon në emër të qytetarëve e jo interesave të ngushta”.
Vetë ambasadorja amerikane, teksa postoi shkrimin e publikuar nga ATSH-ja, shkruante sot se kjo nuk është e vërtetë, pasi ajo nuk ka thënë kështu.
“Ky titull është çorientues dhe duhet të korrigjohet. Kjo nuk është ajo që thashë”,- ka shkruar ambasadorja, teksa poston shkrimin me titull: “Ambasadorja Kim: Qeveria po punon në emër të qytetarëve e jo të interesave të ngushta, dua duartrokitje për ministren Gjonaj”.
Ndërkohë, ajo që realisht ka deklaruar ambasadorja amerikane Kim dje duke i qëndruar kontekstit të saj, ka qenë se: “qeveria duhet të demonstrojë se po punon në emër të qytetarëve dhe jo në emër të interesave të ngushta”.
Fakti që në titullin e ATSH-së, shkruhej e thënë brenda thonjëzave sikur ishte deklaratë nga goja e ambasadore Kim, “Qeveria po punon në emër të qytetarëve e jo interesave të ngushta, dua duartrokitje për ministren Gjonaj”, për diplomaten amerikane, është një shtrembërim fjalësh.
Nuk dihet nëse drejtoresha e ATSH-së, Armela Imeraj Krasniqi, e cila njihet si një njeri i besuar i kryeministrit Rama, të këtë marrë ndonjë vërejtje apo kritikë nga ky i fundit, pas këtij skandali, por një gjë është e qartë… qeveria “Rama” dhe ATSH-ja kanë marrë një “karton të verdhë” nga Ambasada dhe ambasadorja e SHBA-ve.
Në fjalën e shpërndarë dhe publikuar nga vetë ambasadorja, nuk shihet e shkruar në asnjë rresht, kërkesa e Yuri Kim për një duartokitje për ministren Gjonaj.
/GazetaReforma.com/
