Plot 4500 dosje i ka dorëzuar Europol autoriteteve greke lidhur me komunikimet në platformat e kriptuara “Sky ECC” por edhe “Encrochat” të zhvilluara në territorin e Greqisë.
Lajmi është bërë publik nga gazeta greke “Ta NEA”, sipas së cilës pritet të hidhet dritë mbi çështje që kanë të bëjnë me vrasjet, drogën, armët, gjobvënien dhe trafikun e klandestinëve.
Në këto 4500 dosje, sipas burimeve, janë përfshirë rreth 25,000 mesazhe të shkëmbyera mes individëve të përfshirë në krim, ku një pjesë e madhe lidhet me shqiptarët.
Hetimi është kompleks dhe i zgjatur, duke përfshirë edhe rastin e një grupi shqiptaro-grek të trafikut të drogës. Për këtë grup, hetimet zgjatën rreth 9 muaj dhe përfunduan pak ditë më parë me dhjetëra arrestime.
Një nga dosjet përfshin një letër me numra telefoni të përgjuar nga anti-droga, të cilën një oficer policie e ka dërguar përmes platformës “Sky ECC” tek një trafikant, me qëllim mbrojtjen e këtij të fundit nga përfshirja në hetime.
Fotografi të tjera tregojnë sasi droge të sekuestruara nga policia, mes të cilave një ngarkesë e madhe me marijuanë, që nga paketimi duket të jetë e prodhimit shqiptar.
