Është zbardhur takimi midis Presidentit Bajram Begaj dhe Emmanuel Macron mëngjesin e sotëm. Dy hmologët zhvilluan bisedime në forcimin e marrëdhënieve dypalëshe si dhe në drejtim të paqes, sigurisë, dhe zhvillimit të rajonit të Ballkanit Perëndimor, ku përfshihet edhe integrimi i Shqipërisë në BE. Begaj ka vlerësuar kontributin e Francës dhe Macro në procesin e integrimit të Ballkanit Perëndimor në familjen europiane. Ai gjithashtu vlerësoi iniciativën e ndërmarrë një vit më parë nga Presidenti Macron, për lançimin e Komunitetit Politik Evropian, si një iniciativë që i jep më shumë mundësi Shqipërisë dhe vendeve të tjera kandidate në Bashkimin Evropian, të kenë më shumë akses në projektet e BE-së, veçanërisht në fushën e shkëmbimeve universitare dhe studentore. Temë e diskutimit ishte edhe Kosova dhe situata e krijuar pas sulmit terrorist të 24 shtatorit ku mbeti i vrarë një efektiv policie i Kosovës.
Begaj u shpreh se “Kosova është vend sovran dhe i pavarur, dhe akte terroriste si ajo e Banjskës në Zveçan (24 shtator 2023), janë të papranueshme e të dënueshme për sigurinë e saj, por edhe të rajonit e të mbarë kontinentit evropian.”
Presidenti Begaj vlerësoi se pesë vjet pas nënshkrimit të Deklaratës së Partneritetit Strategjik midis dy vendeve, marrëdhëniet midis Shqipërisë dhe Francës kanë hyrë në një fazë të re e shumë dinamike. Begaj shprehu kënaqësinë e tij se përtej marrëdhënieve të konsoliduara kulturore midis dy vendeve, interesi i madh i kompanive franceze, veçanërisht në fushën e energjisë së rinovueshme, por jo vetëm, po i çon marrëdhëniet në një nivel tjetër, edhe më të lartë.
Kujtojmë se vizita e Macron në Shqipëri është një vizitë historike, sepse është e para e një presidenti të Francës në Shqipëri.
