Mesnatën e djeshme qyteti i Vlorës është tronditur nga një ngjarje e rëndë, ku një 25- vjeçar është ekzekutuar në derën e shtëpisë së tij natën e Fiter Bajramit me 5 plumba nga 10 që u shtinë mbi të.
Ngjarja e rëndë ka ndodhur pranë zonës së quajtur “7 pallatet”, ku si pasojë e plumbave të marra ka gjetur vdekjen menjëherë Kristian Breshanaj.
I riu kishte 3 muaj që ishte kthyer nga Belgjika dhe ishte djali i një mjeku reanimator në Spitalin e Vlorës.
Pas ngjarjes së rëndë, autorët dogjën makinën tip BMW me targa greke, në një nga rrugicat e lagjes “10 Korriku, shumë afër vendit të ngjarjes, teksa brenda mjetit u gjet edhe arma tip kallashnikov, e cila u përdor gjatë atentatit.
Së fundmi, detaje të reja janë zbardhur rreth kësaj ngjarjeje, teksa mësohet se 14 persona janë shoqëruar në Polici deri tani, teksa janë sekuestruar të gjitha pamjet filmike të zonës përreth dhe përgjatë zonës ku u gjet makina e djegur e autorëve.
Kristjan Breshanaj njihej si një person pa probleme me drejtësinë, ndërkohë, policia po heton edhe pistën për shkak të detyrës që lidhet me babain e tij, po ashtu dhe për shkak të ndonjë konflikti që mund të ketë pasur ai apo dhe vëllai i tij.
Viktima ishte fëmija i vogël i familjes Breshanaj, ndërsa ka një vëlla më të madh që jeton jashtë vendit.
Aktualisht policia po heton rreth ngjarjes së rëndë që tronditi Vlorën në këtë ditë të shënuar për besimtarët myslimanë, siç është Fiter Bajrami.
