Ditën e sotme PD-ja zyrtare ka publikuar kriteret që do të duhet të kenë kandidatët përpara se të hyjnë në garë për zgjedhjen e kryetarit të ri.
Në dokumentin e publikuar evidentohet se janë përfshirë edhe dy pika që e bëjnë të pamundur futjen në garë të ish-kryeministrit Sali Berisha.
Theksojmë se në kapitullin “aftësitë e angazhimit politik”, në pikën 3 thuhet se “kandidati për kryetar të mos ketë dëmtuar interesat elektorale të Partisë Demokratike në 3 vitet e fundit”.
Praktikisht kjo interpretohet se dalja e Sali Berishës me Partinë e Lirisë në dy procese zgjedhje, në 2022 kur u mbajtën zgjedhjet e pjesshme në 6 bashki dhe në zgjedhjet lokale të 14 majit 2023, mund të konsiderohen dëmtim i interesave elektorale të PD-së.
Gjithashtu ekziston edhe një pikë tjetër me të cilën bëhet e pamundur lejimi i kandidimit të Berishës.
“Të mos ketë masa disiplinore në fuqi sipas parashikimeve të Statutit të Partisë Demokratike”, thuhet në pikën 2 të kapitullit “integriteti moral”.
Prej shtatorit të vitit 2021, Berisha është përjashtuar zyrtarisht nga grupi parlamentar i PD-së pas shpalljes së tij ‘non grata’.
Vendimin për përjashtimin e Berishës nga partia që ai vetë krijoi, e bëri të ditur kreu i kësaj partie, Lulzim Basha, përmes një adresimi në media për këtë çështje.
