Janë zbardhur të tjera detaje rreth ekzekutimit të 65-vjeçarit Gjovalin Prendi, i vrarë mbrëmjen e djeshme në fshatin Pllanë të Lezhës.
Sipas hetimeve paraprake, dyshohet se autorët kanë qenë tre persona që udhëtonin me një automjet tip fuoristradë. Ata janë ndalur pranë lokalit të babait të Sidorel Prendit, i njohur më gjerësisht si Roan Brahimi.
Dy nga autorët, të maskuar, kanë zbritur nga makina dhe kanë qëlluar me breshëri në drejtim të 65-vjeçarit, sapo ky i fundit ishte afruar te dera e lokalit.
Plumbat e kanë goditur në kraharor, ndërsa në ambient ndodheshin edhe familjarë dhe persona të tjerë. Viktima është transportuar menjëherë në spital, por nuk ka mundur t’u mbijetojë plagëve të marra.
Lokali ku ndodhi ngjarja ka qenë më parë objekt i dy sulmeve të tjera, një me armë dhe një me eksploziv.
Roan Brahimi, djali i viktimës, u vra në një atentat në Athinë më 9 maj 2024, në prani të bashkëshortes dhe djalit të tyre të mitur.
Nga atentati mbeti e plagosur edhe bashkëshortja e tij. Brahimi dyshohej për lidhje me disa ngjarje kriminale, përfshirë vrasjen e Gentjan Bejtjes në mars të 2024-ës në Larushk të Krujës.
Prej vitit 2021, ai ishte në kërkim nga policia shqiptare, pas një incidenti në Zejmen ku bashkë me Ramazan Rrajën dhe Alesio Dobrozin, hynë të armatosur në një lokal dhe terrorizuan klientët në kërkim të pronarit.
Emri i Roan Brahimit është përmendur edhe në atentatin ndaj Brilant Martinajt, kushëriri i zhdukur i Ervis Martinajt, ku mbetën të vrarë edhe Besmir Hoxha dhe Dikler Vata.
Ngjarja ndodhi më 17 korrik 2022 në Fushë-Krujë. Gjithashtu, ai dyshohej për përfshirje në atentatin ku humbi jetën Klisman Preçi dhe mbeti i plagosur Ylli Ibrahimi.
