Paraditen e 28 marsit, SPAK kreu një operacion në Elbasan, duke ushtruar kontrolle në banesat e motrave Xhovana dhe Alda Nikolli, si dhe në shtëpinë e prindërve të tyre.
Sipas burimeve nga policia, Gjykata e Posaçme kishte lëshuar urdhër për këto kontrolle dhe për sekuestrimin e celularëve të tyre.
Ky operacion lidhet me shpërthimin e një sasie tritoli në derën e apartamentit ku jetonin motrat Nikolli, ngjarje e ndodhur në korrik 2024, nga e cila humbi jetën fqinji i tyre, Enea Thomaraj, një person pa asnjë precedent penal.
Aksioni nisi në orët e para të mëngjesit, me një vëzhgim të afërt të motrave dhe babait të tyre nga skuadra e posaçme operacionale. Në momentin që ata hipën në një automjet BMW X1 të drejtuar nga babai i tyre, forcat e policisë ndërhynë, u prenë rrugën dhe i informuan për urdhrin e gjykatës për kontrollin e banesave.
Gjatë operacionit, motrave Nikolli dhe babait të tyre iu sekuestruan celularët, ndërsa më pas ata u shoqëruan në banesat e tyre, ku u kryen kontrollet.
Gjatë këtij procesi, motrat hodhën akuza ndaj të penduarit të drejtësisë, Nuredin Dumani, duke e cilësuar atë si porositës të ngjarjes.
SPAK dyshon se Xhovana Nikolli, e fejuara e të penduarit Amarildo Nikolli, dhe motra e saj Alda, e cila kishte një lidhje me Nuredin Dumanin, kanë dijeni për personin që vendosi tritolin në derën e apartamentit të tyre, si dhe për porositësin e sulmit.
Shpërthimi ndodhi më 14 korrik 2024 në katin e katërt të një pallati në lagjen “Haxhias” të Elbasanit. Për shkak të fuqisë së shpërthimit, u shemb dera e banesës së familjes Thomaraj, duke plagosur rëndë djalin e madh, Enea Thomaraj, i cili ndërroi jetë pas katër muajsh në spitalin e Traumës.
