Ambasadorja amerikane Yuri Kim ka zbardhur takimin me kreun e grupit parlamentar të PS-së Taulant Balla, i cili zgjati për rreth 40 minuta në Kryesinë e Kuvendit.
Kim shkruan se me Ballën ka diskutuar për marrëdhëniet e qendrueshme mes dy vendeve tona, si dhe me rëndësinë e Reformës në Drejtësi, si kusht për anëtarësimin në BE.
“U takova me kreun e grupit parlamentar të PS-së, Taulant Balla për të diskutuar për rritjen e bashkëpunimit gjatë kremtimit të njëqindvjetorit të marrëdhënieve mes dy vendeve tona; Theksuam nevojën e vazhdimit të zbatimit të reformës në drejtësi, e cila mbështetet nga SHBA, e nevojshme që Shqipëria të bashkohet në BE, duke respektuar rolin institucional të Parlamentit”, shkruan Kim.
Takimi i Kim me Ballën, ishte i treti në këtë javë, ku të hënën ambasadorja takoi kryeparlamentaren Lindita Nikolla, dhe dje Enkelejd Alibeajn e PD-së.
Mazhoranca socialiste ka nisur nga puna për përzgjedhjen e kandidatëve për presidentin e ri të vendit, ndërkohë që Kushtetuta parashikon që ai të zgjidhet brenda muajit Maj.
3 socialistë, Taulant Balla, Damian Gjiknuri janë në grupin e punës për përzgjedhjen e kandidatëve më të mundshëm, ndërkohë që Enkelejd Alibeaj nga ana tjetër ka shprehur gadishmërinë që opozita të ofrojë kandidatët e saj.
I të kundërtit mendim ka qenë ish-kryeministri Sali Berisha, i cili ka deklaruar prerë të shtunën e kaluar nga Shkodra, se PD nuk do të japë emra për presidentin, pasi çdo negociatë me Ramën, do të zgjaste kohën e tij në pushtet. (lexo lajmin mbi qendrimin e Berishës për zgjedhjen e presidentit)
