Ambasadorja e Shteteve të Bashkuara të Amerikës, Yuri Kim ka ndarë në rrjetet sociale një foto me Gjyqtarët e Kolegjit të Posaçëm të Apelimit. Ambasadorja krahas fotos ka shkruar se pavarësisht presionit të fortë që kanë, gjyqtarët po zbatojnë me përpikmëri Reformën në Drejtësi.
“Gjyqtarët e GJKKO-së së Apelit kanë një nga përgjegjësitë më të vështira: dhënien e gjykimit përfundimtar mbi vendimet e verifikimit. Pavarësisht presionit të fortë, ata kanë vazhduar në zbatimin e këtij elementi të rëndësishëm të reformës në drejtësi.”, shkruan ambasadorja e SHBA-ve krahas fotos.
Kujtojmë se më herët ambasadorja e Shteteve të Bashkuara të Amerikës Yuri Kim është takuar me 15 prokurorë të Prokurorisë së Posaçme (SPAK).
Kim tha se prokurorët e SPAK po bënin një punë të mirë duke ndjekur çështjet penale dhe shton se së shpejti edhe 28 hetues të BKH do të ketë më shumë siguri në hetimin e çështjeve penale.
Mes të tjerash, ambasada shprehet se është lajm i mirë për Shqipërinë që klasa e parë e hetuesve të BKH po iu bashkohet atyre në luftën kundër krimit dhe korrupsionit.
Në mesazhin e saj, ambasada amerikane paralajmëron se 28 hetuesit e BKH do të ndjekin penalisht dhe do bëjnë përgjegjës ata që dëmtojnë shqiptarët dhe pasurojnë vetveten përmes krimit të organizuar dhe korrupsionit.
Ndërsa në fund të postimit të bërë në faqen e Ambasadës Amerikane në Shqipëri thuhet se koha e pandëshkueshmërisë kishte marrë fund dhe se përgjegjësit që dëmtojnë shqiptarët duke grabitur pasuritë e tyre do të viheshin para drejtësisë.
