Ambasadorja e Shteteve të Bashkuara të Amerikës në Shqipëri, Yuri Kim, i ka bërë thirrje mediave që të jenë të paanshme dhe të mos mbajnë krahun e asnjë prej partiva politike, pasi media është shumë e rëndësishme. Gjithashtu, ambasadorja Kim tha se mungojnë pyetjet e vështira dhe se gazetarët duhet të jenë më të “ashpër”, pasiu iu detyrohen qytetarëve shqiptarë.
“Media është jashtëzakonisht e rëndësishme. Reporterët janë jashtëzakonisht të rëndësishëm. Duhet ta bëjnë punën e tyre me profesionalizëm, integritet dhe etikë. E di shumë mirë që shumë media këtu në Shqipëri anojnë nga një krah apo një tjetër.
Mendoj se reporterët kanë përgjegjësinë që të përpiqen të paraqesin faktet sa më mirë të munden. Kjo do të thotë edhe që të mos biesh dakord me dikë thjesht sepse është nga partia që të pëlqen ty.
Duhet të bësh pyetjet e vështira. E kam thënë edhe në intervista të tjera më parë, kam respekt për reporterët që më bëjnë pyetje të vështira. Nëse kam thënë diçka qesharake, duhet të më sfidosh.
Nëse kam thënë diçka që nuk është e qartë, duhet të më detyroni ta sqaroj; është detyra ime të përgjigjem dhe mendoj është detyra e reporterëve të kërkojnë përgjigje në emër të qytetarëve”, u shpreh ambasadorja.
