Pasi vendosi veton për hapjen e negociatave me Shqipërinë dhe Maqedoninë e Veriut, Franca ka dalë me një propozim për reformimin e procesit të anëtarësimit në BE.
Katër parimet e platformës franceze janë, asociimi gradual, kushte të rrepta, përfitime të prekshme dhe mundësia e kthimit pas, shkruan “DW”.
Franca kërkon që të rritet mbështetja financiare për vendet kandidate, në mënyrë që të frenohet emigracioni.
Përsa i përket kushteve të rrepta , duhet të bëhet një plan më afatgjatë, në mënyrë që vendet kandidate të përshtaten me normat evropiane në fushën e sundimit të ligjit dhe konvergjencën ekonomike e sociale.
Franca propozon që të mos hapen njëkohësisht një numër i madh kapitujsh tematikë, por që të ketë disa faza.
Gjithashtu Parisi zyrtar kërkon që BE të ketë mundësinë të tërhiqet nga ky proces, për të siguruar besueshmërinë dhe atraktivitetin .
Kjo nënkupton, që të shqyrtohet mundësia e pezullimit të përfitimeve nëse vendet kandidate bëjnë një gabim dhe deri te ndalimi i përgjithshëm, nëse shkelen vlerat bazë të BE.
