Presidenti serb, Aleksandër Vuçiç e ka bërë të qartë se nëse populli serb rrezikohet, Serbia do të presë 24 orë për intervenim të NATO-s para se të hyjë në Kosovë.
Vuçiç tha se Serbia nuk ka hyrë në territorin e Kosovës, jo sepse nuk e konsideron si territor të saj, por sepse sipas Marrëveshjes së Kumanovës, nuk ka të drejtë ta bëjë këtë.
“I kam thënë Stoltenbergut, që nuk do të futemi në Kosovë nëse rrezikohet populli serb, para se të presim 24 orë për intervenim të NATO-s. Serbia nuk ka hyrë në territorin e Kosovës, jo sepse ne nuk e konsiderojmë si territor tonë, por sepse sipas Marrëveshjes së Kumanovës, ne nuk kemi të drejtë ta bëjmë këtë.
Automjetet me mitraloz qëndrojnë në vendkalimet tash e shtatë ditë dhe askush nuk emocionohet. Dhe pastaj ata emocionohen që një vend që është i njohur ndërkombëtarisht ka aeroplanë që fluturojnë në territorin e tij. Ata nuk janë të interesuar për vuajtjet serbe”, ka thënë Vuçiç për televizionin Pink TV.
Tensionet në veri të Kosovës kanë qenë të shumta javën e fundit, pasi qeveria mori vendimin për vendosjen e reciprocitetit të targave me Serbinë. Automjetet që hyjnë në Kosovë nga Serbia, duhet të pajisen me targa të përkohshme të Republikës së Kosovës. Targat janë të vlefshme për 60 ditë dhe për to shoferët duhet të paguajnë 5 euro.
