Një person është gjetur i pajetë në një automjet tip “Benz” në zonën e ish Kënetës.
Vrasja ka ndodhur rreth orës 01:10 pas mesnate, ndërsa viktima është shtetasi Martin Ndreca 45-vjeç me origjinë nga Mirdita. Policia e Durrësit ka identifikuar autorin dhe është vënë në ndjekje të tij. Autori dyshohet të jetë shtetasi Ndue Zefi 37 vjeç.
Sipas të dhënave policore, bëhet me dije se viktima dhe autori njiheshin me njëri-tjetrin, madje para vrasjes kishin qenë të ulur bashkë në lokalin e lagjes. Pikërisht aty, teksa pinin ka nisur një konflikt mes tyre.
Mësohet se ata nuk janë konfliktuar fizikisht, por kur janë ngritur autori Ndue Zefi 37-vjeç ka shkuar në banesën e tij dhe ka marrë kallashnikovin për të “larë hesapet”.
Ai i ka zënë pritë fqinjit të tij Martin Ndreca 45 vjeç dhe e ka qëlluar.
Mbi trupin e viktimës janë derdhur pesë plumba, zhurma e të cilave ka zgjuar gjithë lagjen. Kanë qënë banorët e zonës ata që kanë gjetur të pajetë 45-vjeçarin si dhe kanë lajmëruar më pas policinë.
Informacion Paraprak
Më datë 24.02.2019, rreth orës 01:10, në lagjen Ish Kënetë, shtetasi N.Z. 37 vjeç, për motive të dobëta dyshohet se ka vrarë me armë zjarri shtetasin M.N., 45 vjeç, banues në kete lagje.
Autori i dyshuar pas krimit është larguar menjëherë dhe është shpallur në kërkim. Policia po punon për kapjen e tij.
Grupi Hetimor në bashkëpunim me Prokurorinë e Rrethit Gjyqësor Durrës po punojnë për zbardhjen e plotë të rrethanave te kësaj ngjarje.
