Lulzim Toçi, 31 vjeç, i dënuar për vrasjen makabre të bashkëshortes së tij, Eleanor Toçi, ka kryer vetëvrasje në burgun Santa Maria Capua Vetere në Caserta, Itali.
Ai u gjet i vetëvarur mesditën e 11 qershorit, në repartin psikiatrik të institucionit ku vuante dënimin. Sipas raportit mjekësor të burgut, Toçi vuante nga skizofrenia akute.
Ngjarja që tronditi opinionin publik ndodhi më 9 tetor 2024, në qytetin San Felice a Cancello, ku 24-vjeçarja Eleanor u mbyt brenda banesës së çiftit, përpara syve të dy fëmijëve të mitur, atëherë vetëm 6 dhe 4 vjeç.
Zbulimi i ngjarjes erdhi përmes një video-telefonate: kunata e viktimës e kishte telefonuar nga shqetësimi për mungesën e saj, dhe në video ishte përgjigjur djali 6-vjeçar, i cili i tregoi trupin e pajetë të nënës.
Familjarja lajmëroi menjëherë policinë, e cila arrestoi Toçin pranë shtëpisë së tij, pasi ai ishte kthyer nga urgjenca me vëllain e vet.
Gjatë procedurave gjyqësore, Toçi pranoi autorësinë e krimit, por dha versione kontradiktore dhe të paqarta për motivin. Fillimisht foli për një konflikt të çastit, me pretendimin se gruaja i kishte ndaluar të dilte nga banesa natën.
Më pas deklaratat e tij u bënë të çoroditura dhe të pavendosura, duke lënë të kuptohet prania e halucinacioneve dhe gjendjes së rënduar mendore.
Vrasja, e kryer në prani të fëmijëve dhe rrëfimet e mëvonshme të ngatërruara, e bënë këtë rast një nga më të rëndët në kronikën e dhunës në familje në Itali me autorë shqiptarë.
Me aktin e vetëvarjes së Lulzim Toçit, çështja merr një fund tragjik, ndërsa dy fëmijët e mbetur jetimë janë ende nën kujdesin e familjarëve.
