Prokuroria e Tiranës ka përfunduar hetimet dhe ka dërguar për gjykim Darment Kelin, 25 vjeç, i akuzuar për vrasjen e Amarildo Hoxhallarit, ngjarje e ndodhur më 24 gusht të vitit të kaluar.
Sipas dosjes hetimore, konflikti nisi pasi viktima Amarildo Hoxhallari dhe shoku i tij A.M. dyshohet se ngacmuan me fjalë një vajzë në rrugë.
Veprimi u pikas nga Keli nga ballkoni i banesës së tij. Ai zbriti menjëherë poshtë, duke marrë me vete një thikë, dhe u përfshi në një përplasje fizike me dy të rinjtë.
“Në konflikt e sipër, ai goditi disa herë me thikë shtetasin A.H., në pjesë të ndryshme të trupit, duke i shkaktuar vdekjen,” thuhet në arsyetimin e Prokurorisë.
Keli ka deklaruar se vajza që u ngacmua ishte e fejuara e tij, e cila po shkonte për të takuar një të afërme. Ai ka pranuar se e pa gjithçka nga ballkoni dhe ndërhyri në përplasje duke përdorur mjetin prerës.
Për pasojë, ndaj Darment Kelit rëndon akuza e “vrasjes me dashje”.
Hoxhallari u dërgua në spital në gjendje të rëndë, por ndërroi jetë pak më vonë. Autori fillimisht u largua nga vendi i ngjarjes, por u arrestua më pas nga policia.
Viktima rezultonte me precedentë penalë. Në vitin 2015 ai ishte arrestuar së bashku me kushëririn Aurel Hoxhallari, për një atentat të dështuar ku mbetën të plagosur dy persona, ndër ta edhe efektivi Roland Meta.
Objektiv i sulmit ishte Pajtim Serjani, mik i Emiljano Shullazit.
Ndërkohë, Aurel Hoxhallari është dënuar një vit më parë me burgim të përjetshëm nga Gjykata e Posaçme, si porositës i vrasjes së Devi Kasmit në janar të vitit 2018.
