Një ngjarje e rëndë ka tronditur opinionin publik në Greqi, ku një grua greke dyshohet se ka bashkëpunuar me të dashurin e saj dhe tre persona të tjerë, mes tyre dy shqiptarë, për të vrarë ish-bashkëshortin, një shtetas polak 43-vjeçar, me profesion profesor.
Sipas burimeve të “Protothema.gr”, viktima kishte depozituar më herët një kallëzim penal ndaj partnerit aktual të ish-bashkëshortes, për dhunë dhe kërcënime, duke shprehur frikën për jetën e tij.
I dyshuari kryesor, partneri aktual i gruas, ka pranuar në polici përfshirjen në vrasje, duke deklaruar: “Nuk mund ta shihja më të dashurën time të trishtuar dhe të stresuar. Vendosa ta bëj. Mora përsipër gjithçka.” Ai ka tentuar të marrë të gjithë përgjegjësinë mbi vete, por hetimet tregojnë se krimi ishte i planifikuar në bashkëpunim me gruan.
Rekrutimi i bashkëpunëtorëve dhe alibia e rreme
Autori i dyshuar ka rekrutuar tre bashkëpunëtorë: dy shqiptarë dhe një bullgar. Sipas rrëfimit të tij, ai u kishte thënë atyre se do të “rrihnin dikë që po i shkaktonte probleme të dashurës”, ndërsa për t’i bindur u kishte premtuar se “Nadia (gruaja) do të paguante për avokatët nëse ndodhte ndonjë problem”.
Për të realizuar lëvizjet, autorët përdorën një automjet luksoz Porsche Cayenne të marrë me qira, i cili u gjurmua më pas nga autoritetet dhe çoi në identifikimin e shqiptarëve të përfshirë. Automjeti e kishte ndjekur viktimën nga Haidari deri në Agia Paraskevi, ku ndodhi vrasja.
Pas krimit, autori u largua me taksi në drejtim të Nafplionit, ndërsa telefonin dhe çelësat ia dorëzoi një personi tjetër për të ndërtuar një alibi të rreme, sikur ndodhej në një zonë tjetër në kohën e vrasjes.
Prova që implikon gruan
Ish-bashkëshortja e viktimës, një 43-vjeçare, dyshohet se ka ndihmuar në organizimin e krimit. Ajo fik telefonin dhe fshiu të gjitha të dhënat menjëherë pas vrasjes, por policia zbuloi në pajisjen e saj një foto të viktimës, e shkrepur nga pas, ditën e ngjarjes duke e implikuar si pjesë aktive në planifikim. Nuk dihet ende se kujt i është dërguar fotografia.
Për më tepër, komunikimet mes saj dhe autorit janë kryer përmes aplikacionit të koduar “Signal”, duke përdorur një numër telefoni që i përkiste djalit të saj një tjetër përpjekje për të shmangur gjurmimin.
Roli i shqiptarëve dhe versioni i tyre
Dy shqiptarët dhe shtetasi bullgar të përfshirë në ngjarje kanë pranuar përfshirjen, por kanë deklaruar se nuk kishin dijeni se do të ndodhte vrasja sipas tyre, ishin paguar vetëm për të frikësuar viktimën.
Ata pretenduan se pas ngjarjes, i kërkuan autorit 50 mijë euro për të mos e denoncuar, ndërsa ai u kishte paguar vetëm 2 mijë euro fillimisht për “rrahjen” e profesorit.
Autori është arrestuar dhe akuzohet për vrasjen me pesë plumba të 43-vjeçarit, ndërsa tre bashkëpunëtorët janë vënë nën akuzë si ndihmës në vepër penale.
Nga hetimet rezulton se konflikti kishte nisur për çështje familjare dhe mosmarrëveshje financiare mes ish-çiftit, që kishin edhe dy fëmijë së bashku.
Hetimet vijojnë, ndërsa autoritetet greke kanë të dhëna të shumta që sugjerojnë se kemi të bëjmë me një vrasje të planifikuar dhe të organizuar në detaje.
