Vrasja tragjike e 14-vjeçarit Martin Cani po shoqërohet nga akuzat për fshehje të së vërtetës dhe mbulim të autorëve të përfshirë.
Ndërkohë që Mario Përlleshaj është shpallur autor i krimit, qytetarë të ndryshëm dhe opozita akuzojnë organet e drejtësisë për mbajtjen jashtë hetimeve të një autori të dytë të dyshuar, Kledjon Bejkaj.
Sipas denoncimeve të publikuara , Bejkaj, i akuzuar nga babai i njërit prej të plagosurve, po mbrohet nga drejtësia për shkak të lidhjeve familjare.
Prindërit e tij, Maksim Bejkaj dhe Nevila Bejkaj, janë punonjës të strukturave të larta të Prokurorisë së Posaçme (SPAK) dhe Byrosë Kombëtare të Hetimit (BKH).
Në disa denoncime qytetare, thuhet se policia dhe SPAK po përpiqen ta mbajnë Bejkajn larg hetimeve për shkak të pozitave të prindërve të tij. Ata pretendojnë se vetëm Përlleshaj po mbahet përgjegjës për krimin, ndërsa Bejkaj po fshihet qëllimisht.
Akuzat theksojnë gjithashtu trajtimin e privilegjuar të Përlleshajt, i cili po trajtohet në një spital privat, ndërsa një tjetër i plagosur rëndë vazhdon të jetë në gjendje të rënduar.
Drejtësia dhe politizimi i çështjes
Duke i cilësuar këto si një “mbulim skandaloz”, qytetarët akuzojnë qeverinë dhe institucionet për ndërhyrje në hetime dhe manipulim të drejtësisë. Për momentin, SPAK dhe policia nuk kanë dhënë një reagim të detajuar mbi pretendimet për përfshirjen e Bejkajt.
Çështja vazhdon të tronditë opinionin publik, duke ngritur pikëpyetje mbi transparencën e hetimeve dhe ndikimet politike në drejtësi.
Ndërkohe nënkryetari i Partisë Demokratike, Flamur Noka, ka shpërndarë në rrjetet sociale një dokument që përmban procesverbalin e parë nga oficeri i policisë gjyqësore për vrasjen e Martin Canit, ku thuhet se në ngjarje kanë qenë të përfshirë pesë persona.
Noka akuzon Policinë e Shtetit se po ‘fsheh krime aty ku të përfshirë janë patronazhistët e Ramës dhe familjarë e fijet e narkoshtetit’.
‘Ja prova! Ja prova e dokumentuar që vrasësi i Martin Canit nuk ishte vetëm. Kupola e Policisë së Shtetit fsheh krime aty ku të përfshirë janë patronazhistët e Ramës dhe familjarë e fijet e narkoshtetit. Kupola blu është de facto një bandë me uniformë. Policë që vrasin, policë që dekonspirojnë, që fshehin e mbulojnë llumin me pushtet.
