Gjykata Penale e Tiranës ka caktuar masën e arrestit në burg për Eduart Lamin, i cili u arrestua dy ditë më parë pas kontrolleve të kryera në lidhje me vrasjen e Lulzim Vishes.
Gjatë kontrollit të ushtruar në disa ambiente në pronësi të Lamit dhe kushëririt të tij, Ervis Lami, i cili u shpall në kërkim, policia ka gjetur një armë zjarri dhe municione.
Për këtë arsye, Lamit i është ngarkuar akuza për armëmbajtje pa leje.
Lulzim Visha, viktima e vrasjes, u gjet i vrarë më 24 janar 2025 në makinë, pas raportimit nga një banor i zonës.
Visha, i cili punonte në një postë private, ishte nisur për në punë dhe u qëllua 200 metra larg banesës së tij.
Policia, pas mbërritjes në vendngjarje, ka gjetur 12 gëzhoja brenda automjetit ku ndodhej viktima.
Eduart Lami ka deklaruar se nuk ka pasur konflikte me familjen e viktimës:
“Nuk kemi pasur konflikt me familjen e viktimës. Në dijeninë time nuk kemi pasur asnjë debat apo përplasje. Nuk e di për pjesëtarë të tjerë të familjes nëse kanë pasur konflikte me dy vëllezërit Visha. Por unë personalisht dhe nga ajo çfarë di unë nuk kemi pasur konflikte”.
