Janë publikuar pamje të tjera nga atentati ndaj 27-vjeçarit Klaudio Prendi, i cili u vra disa ditë më parë në zonën e Xhamllikut në Tiranë.
Pamjet tregojnë momentin kur Prendi hipën i vetëm në automjetin e tij të parkuar, pasi kishte dalë nga një lokal. Gjithçka ndodh brenda 7 sekondave një automjet tip “Audi A4” iu afrua dhe autorët lëshuan një breshëri plumbash, duke i shkaktuar vdekjen.
Policia ka zgjeruar hetimet dhe po shqyrton disa pista lidhur me motivet e mundshme të vrasjes. Përveç borxheve dhe lidhjeve të mundshme me babain e tij, ish-gjyqtarin Fran Prendi, po verifikohen dyshime për dhënie parash me fajde dhe përfshirje në baste sportive.
Grupi i hetimit dyshon se disa persona që kishin fituar shuma të mëdha parash nga Prendi nuk i kishin paguar, çka mund të ketë çuar në vrasjen e tij. Po ashtu, po hetohen dhe lidhje të dyshimta me aktivitete të tij jashtë vendit.
Sipas informacioneve të mëparshme, Prendi kishte një borxh prej 15 mijë eurosh dhe ishte përfshirë në përplasje fizike për shkak të mospagimit të këtij borxhi.
Babai i tij, Fran Prendi, ka thënë se ishte në dijeni të konflikteve të djalit, por nuk kishte mundur të parashikonte një ngjarje kaq tragjike.
