Gjykata e Posaçme ka shpallur vendimin për çështjen e vrasjes së ish-efektivit të policisë Santiago Malko, duke dënuar Leonard Dukën me 30 vite burg. Vendimi u mor pas një procesi të gjatë gjyqësor dhe konfirmon përgjegjësinë penale të Dukës për përfshirjen në ngjarjen e rëndë kriminale.
Ndërkohë, për Erlis Dukën, vëllain e Leonard Dukës, gjykata vendosi heqjen e masës së arrestit në burg, pasi ai u shpall i pafajshëm për të gjitha akuzat e ngritura ndaj tij. Për të njëjtën ngjarje, gjykata dënoi edhe Fatmir Hysenin, i njohur si Doqja, me 25 vite burg, Aleksandër Maxhakun me 25 vite burg, si dhe Oltian Logajn po me 25 vite burg.
Kujtojmë se javën e kaluar Prokuroria e Posaçme kishte kërkuar dënimin e Leonard Dukës me 32 vite burg për veprat penale “vrasje me paramendim”, “grup i strukturuar kriminal” dhe “mbajtje pa leje të armëve dhe municioneve”. Sipas SPAK, Duka ka pasur një rol kyç në organizimin dhe realizimin e atentatit ndaj ish-policit.
Gjatë seancave gjyqësore, Leonard Duka ka deklaruar vazhdimisht pafajësinë e tij, duke pretenduar se ndaj tij nuk ekzistojnë prova konkrete dhe se procesi është i montuar nga policia.
“Jam i pafajshëm dhe Prokuroria nuk ka asnjë fakt kundër meje. Kjo është e montuar nga policia. Kam besim te drejtësia”, u shpreh ai para trupit gjykues.
Ish-polici Santiago Malko u ekzekutua mbrëmjen e 27 gushtit 2019 në zonën e Xhamllikut në Tiranë. Ai u qëllua me breshëri kallashnikovi teksa udhëtonte me automjetin e tij BMW X5. Pas përplasjes së mjetit me një mur lavazhi, autorët iu afruan dhe e qëlluan në kokë, duke i shkaktuar vdekjen e menjëhershme.
Në seancën e fundit, Leonard Duka pranoi se kishte pasur takime me Martinajn, por mohoi komunikime të vazhdueshme dhe përdorimin e aplikacionit të koduar SKY ECC, ndonëse prokuroria paraqiti prova që sugjerojnë të kundërtën.
Malko kishte shërbyer si efektiv policie vetëm për tre muaj në strukturën e Patrullës së Përgjithshme në Tiranë dhe njihej për lidhje me botën e krimit. Ai ishte i përfshirë edhe në ngjarjen e 4 tetorit 2018 në ish-Bllok, ku mbeti i vrarë Fabian Gaxha pas një përplasjeje të armatosur ku u përfshinë disa figura të njohura të botës së krimit.
Leonard Duka u arrestua më 14 shkurt 2023 në Bruksel nga autoritetet belge, pasi në banesën e tij u gjetën armë zjarri dhe një sasi e konsiderueshme parash. Ai u ekstradua në Shqipëri në gusht 2024 dhe po përballet me drejtësinë për një nga ngjarjet më të rënda kriminale të viteve të fundit.
