Gjykata e Tiranës ka dhënë masën e sigurisë “arrest me burg” për Elvis dhe Gjon Shkëmbin, të cilët akuzohen për vrasjen e gjyqtarit të Apelit, Astrit Kalaja, tre ditë më parë, në ambientet e Gjykatës së Apelit të Juridiksionit të Përgjithshëm në Tiranë. Vendimi u mor pas një seance të gjatë dëgjimore, ku të dy të pandehurit u paraqitën para trupit gjykues, ndërsa në sallë mbretëroi tension dhe tronditje.
Avokati i tyre mbrojtës, Kujtim Ibra, në një deklaratë për mediat pas seancës, theksoi se Elvis Shkëmbi ka vepruar në gjendje të rënduar psikike, pas një periudhe shumë të gjatë përplasjesh gjyqësore lidhur me pronat e familjes në Shkodër. Sipas tij, i riu nuk ka pasur vetëdije të plotë në momentin e ngjarjes.
“Shtetasi nën hetim ka qenë totalisht i mpirë pas kryerjes së krimit dhe ka pritur me qetësi forcat e policisë. Ai nuk ka bërë asnjë tentativë për t’u larguar, edhe pse ka pasur mundësinë. Pas ngjarjes, ai i ka dorëzuar pistoletën njërit prej punonjësve të gjykatës dhe ka qëndruar në vend, duke pritur që të mbërrinte policia. Kjo tregon se në momentin e ngjarjes ka qenë në gjendje të rënduar emocionale dhe të tronditjes së thellë psikike”, u shpreh Ibra.
Lidhur me përfshirjen e xhaxhait të tij, Gjon Shkëmbit, avokati deklaroi se nuk ka asnjë provë që ai të ketë shtyrë apo nxitur nipin për të kryer krimin.
“Gjon Shkëmbi nuk ka marrë pjesë në momentin e ndodhjes së ngjarjes. Ai ka deklaruar se nuk ka pasur dijeni për atë që do ndodhte dhe nuk ka pasur mundësi ta parandalonte nipin e tij. Askush nuk i del përpara një personi të armatosur që ndodhet në gjendje të rënduar emocionale. Në ato momente, Gjon Shkëmbi kishte kaluar derën e sallës së gjyqit, dhe menjëherë më pas ndodhi e shtënat”, theksoi avokati Ibra.
Ai u ndal gjithashtu te deklaratat e mëparshme që Gjon Shkëmbi kishte bërë publikisht në media, të cilat janë interpretuar si kërcënime për gjyqtarët që do merreshin me çështjen e tyre. Sipas mbrojtjes, këto deklarata janë nxjerrë nga konteksti.
“Nëse ato do të ishin veprime që përbëjnë kanosje, atëherë organet e drejtësisë, qoftë Prokuroria e Tiranës apo ajo e Shkodrës, do të kishin nisur procedim penal në atë kohë. Por kjo nuk ka ndodhur, çka tregon se nuk ka pasur elementë të tillë ligjorë. Deklaratat janë interpretuar ndryshe dhe jashtë rrethanave të asaj kohe”, tha më tej Ibra.
Në përfundim të seancës, të dy të arrestuarit, Elvis dhe Gjon Shkëmbi, kanë kërkuar falje publike për familjen e gjyqtarit të ndjerë, duke shprehur keqardhje për ngjarjen tragjike që ka tronditur opinionin publik. Ata kanë dëshmuar se e gjithë situata ka ardhur si pasojë e një stresi të thellë dhe një kalvari të gjatë gjyqesh për pronat familjare që, sipas tyre, i kanë lënë të dëshpëruar dhe të pafuqishëm.
Ngjarja e rëndë ndodhi pasditen e 6 tetorit, në ambientet e Gjykatës së Apelit në Tiranë. Gjatë shpalljes së vendimit për çështjen e pronave në Shkodër, ku palë ishin Elvis dhe Gjon Shkëmbi, 38-vjeçari Elvis Shkëmbi nxori armën e zjarrit dhe qëlloi drejt gjyqtarit Astrit Kalaja, i cili humbi jetën në vend. Nga të shtënat mbetën të plagosur edhe dy persona të tjerë që ndodheshin në sallë si palë në proces.
Pas ekzekutimit, autori nuk tentoi të largohej, por qëndroi i qetë në vendin e ngjarjes, deri në mbërritjen e policisë. Vrasja e gjyqtarit Kalaja në krye të detyrës ka tronditur sistemin e drejtësisë dhe ka ngjallur reagime të forta në mbarë opinionin publik, ndërsa hetimet për zbardhjen e plotë të rrethanave vazhdojnë nën drejtimin e Prokurorisë së Tiranës.
