Gjykata e Korçës ka vendosur të lërë në fuqi masën e sigurisë “arrest me burg” për Andi Shkulakun, i cili u arrestua tre ditë më parë me urdhër të prokurorisë së qytetit, nën akuzën e moskallëzimit të krimit lidhur me vrasjen e Egli Progës.
Arrestimi i tij u bë pas administrimit të një dëshmie të re nga prokuroria, ku thuhet se 42-vjeçari Proga fillimisht është dhunuar brenda ambienteve të lokalit nga Leonidha Guçe, përpara se të goditej jashtë lokalit nga Denis Meçe. Ky zhvillim i fundit e rëndon më tej pozitën e Guçes në hetim.
Sipas hetimeve, Shkulaku dyshohet se ka qenë prezent në vendngjarje, ka parë gjithçka dhe është larguar pa raportuar asgjë në organet ligjzbatuese. Edhe pse vetëm pak ditë më parë prokuroria e Korçës e kishte mbyllur hetimin dhe kishte dërguar dosjen për gjykim, dëshmia e re e marrë tashmë pritet të ndikojë rrjedhën e çështjes.
Në dosjen aktuale, Denis Meçe është i akuzuar për “vrasje me dashje”, ndërsa Leonidha Guçe, Voltan Shkulaku dhe Arjan Manellari për “veprime që pengojnë zbulimin e së vërtetës”. Me shumë gjasa, prokuroria do të bashkojë dosjen e re me atë ekzistuese, duke riaktivizuar hetimet për të gjithë të përfshirët.
Ngjarja e rëndë ndodhi më 10 gusht 2024. Sipas dëshmive të mbledhura nga policia, Egli Proga kishte shkuar në një lokal për të pirë, ku ndodheshin disa persona të tjerë, si brenda ashtu edhe jashtë lokalit, të gjithë në gjendje të dehur. Fillimisht ai është ulur me një shtetas tjetër brenda lokalit, me të cilin ka konsumuar pije, ndërkohë që jashtë ndodheshin autori i dyshuar Denis Meçe dhe dy persona të tjerë.
Situata ka degjeneruar kur Meçe është afruar pranë Progës, duke kërkuar një cigare, çka ka sjellë tensione mes tyre. Pas një debati të ashpër, Meçe i ka kërkuar Progës të dalin jashtë për të “sqaruar” situatën. Sapo kanë dalë, Meçe e ka shtyrë ose goditur Progën, i cili është rrëzuar, duke pësuar më pas pasoja fatale.
Zhvillimet e fundit pritet të ndikojnë ndjeshëm në ecurinë e procesit gjyqësor për vrasjen që tronditi vendin verën e kaluar.
