Gjykata e Tiranës ka dënuar me gjithsej 55 vite burg dy autorët e vrasjes së biznesmenit Edmond Papa, i cili u ekzekutua më 16 dhjetor 2022 në zonën e Selitës.
Vendimi erdhi pas pranimit të kërkesës së prokurorisë për shpalljen fajtor të të pandehurve për vrasje me paramendim në bashkëpunim.
Andrew Bode, i identifikuar si ekzekutori, u dënua me 30 vite burg për “vrasje me paramendim” dhe “mbajtje pa leje të armëve”, ndërsa bashkëpunëtori i tij, Alban Velo, 30 vjeç, mori 25 vite burg për të njëjtën akuzë.
Të dy do të vuajnë dënimin në një burg të sigurisë së lartë, për shkak të rrezikshmërisë së tyre.
Si ndodhi ngjarja?
Ngjarja ndodhi pasditen e 16 dhjetorit, kur Edmond Papa u qëllua me nëntë plumba teksa ndodhej në një lokal në rrugën “Fadil Bodinaku”. Ai humbi jetën gjatë transportit për në spital.
Sipas hetimeve, motivi i vrasjes ka qenë hakmarrja, e lidhur me atentatin ndaj 27-vjeçarit Aleksandër Sadikaj, i vrarë me eksploziv disa muaj më herët.
Policia identifikoi Velo si personin që vëzhgonte lëvizjet e viktimës, ndërsa Bode si ekzekutori. Velo u arrestua brenda vendit, ndërsa pas hetimeve u përfshi në dosje edhe babai i tij, Dilaver Velo, një ish-punonjës policie, i cili u shkarkua menjëherë pas ekspozimit të lidhjeve të djalit të tij me krimin.
Edmond Papa kishte precedent penal për trafik droge në Greqi dhe ishte i skeduar më parë edhe në Britaninë e Madhe.
Hetimet treguan se ai ishte përfshirë në rrjete trafiku droge mes Turqisë, Shqipërisë dhe Anglisë, si dhe dyshohej për pastrim parash. Ai banonte mes Sarandës dhe Fierit, por udhëtonte shpesh jashtë vendit.
