Presidenti i Shteteve të Bashkuara, Donald Trump, ka reaguar pas vrasjes së dy punonjësve të Ambasadës Izraelite përpara Muzeut Hebraik në Uashington, duke e cilësuar ngjarjen si një akt të qartë antisemitik dhe duke dënuar ashpër dhunën.
Përmes një postimi në rrjetet sociale, Trump u shpreh:
“Vrasjet e tmerrshme në Uashington, të nxitura haptazi nga antisemitizmi, duhet të marrin fund menjëherë! Nuk ka vend për urrejtje dhe radikalizëm në SHBA. Ngushëllime të sinqerta familjeve të viktimave. Është tragjike që ngjarje të tilla mund të ndodhin. Zoti ju bekoftë të gjithëve.”
Sipas raportimeve, viktimat, një burrë dhe një grua, punonjës të Ambasadës së Izraelit u qëlluan me armë zjarri jashtë Muzeut Hebraik në kryeqytetin amerikan, teksa ndodheshin atje për të marrë pjesë në një aktivitet kulturor.
Autori i dyshuar është arrestuar dhe po merret në pyetje nga autoritetet.
Zëdhënësi i ambasadës izraelite, Tal Naim Cohen, konfirmoi identitetin e viktimave si zyrtarë të institucionit dhe bëri të ditur se ngjarja ndodhi gjatë një veprimtarie zyrtare.
Ai theksoi besimin e plotë të ambasadës tek autoritetet amerikane dhe kërkoi një hetim të shpejtë dhe të thelluar.
Ndërkohë, drejtori ekzekutiv i Komitetit Amerikan Hebraik, Ted Deutsch, konfirmoi se aktiviteti ishte organizuar nga komiteti që ai drejton dhe shprehu tronditjen dhe dhimbjen për sulmin vdekjeprurës.
