Pas ngjarjes tragjike të vrasjes së 14-vjeçarit Martin Cani pranë shkollës “Fan Noli” në Tiranë, qytetarët janë mbledhur për herë të dytë për të kërkuar përgjegjësi nga autoritetet shtetërore dhe dorëheqjen e ministres së Arsimit, Ogerta Manastirliu.
Protestuesit kërkuan masa të forta për të garantuar sigurinë e fëmijëve në shkolla dhe mbajtjen e përgjegjësisë nga institucionet për dështimin në trajtimin e kësaj ngjarjeje tragjike.
Një protestues u shpreh se vendi duhet “shkulur nga themelet” dhe shtoi se ka nevojë për reagim institucional për të parandaluar ngjarje të tilla. Ai theksoi se Ministria e Arsimit, Drejtoria e Arsimit të Tiranës dhe Drejtoria e Shkollës nuk kanë reaguar siç duhej për të parandaluar tragjedinë.
“Fëmijët janë të rritur, por nëse nisemi me premisën që meqë s’kam nuk shkojmë asgjëkundi. Shoqëria ka nevojë për sensibilizim. Përderisa nuk ka reagim për mbajtje përgjegjësie, duhet shkulur nga themelet. Shpresoj se duhet të ketë reagim institucional,” tha ai.
Përveç kërkesës për dorëheqjen e ministres, protestuesit kanë vendosur pankarta me mesazhe të fuqishme. Disa nga ato që mbajnë qytetarët janë: “Institucionet e papërgjegjshme vrasin”, “Skandalet vinë e ikin, karrigia mbetet”, dhe “Dorëheqja është për të fortët, të dobëtit mbahen pas karriges”.
Një tjetër protestues u shpreh se kjo është dhimbja e çdo familjeje shqiptare dhe theksoi se nuk mund të qëndronte pa vepruar pas tragjedisë, duke shtuar se fëmijët e tij kanë ikur nga Shqipëria për shkak të rënies së sigurisë.
Prindërit dhe qytetarët kërkojnë gjithashtu që ngjarja të zbardhet plotësisht dhe të vendoset drejtësi. Ata theksuan se ky krim nuk është një ngjarje e veçuar, por një pasojë e dështimit të sistemit arsimor dhe të institucioneve shtetërore për të siguruar një mjedis të sigurt për fëmijët.
