Prokuroria e Durrësit ka përfunduar hetimet dhe ka dorëzuar për gjykim dosjen penale për Hysen, Hygerta dhe Amarildo Metën, të akuzuar për vrasjen e Pëllumb Metës, një ngjarje e cila tronditi opinionin publik.
Sipas akuzës, Hygerta dhe Hysen Meta janë të akuzuar për vrasje me paramendim, ndërsa Amarildo Meta akuzohet për asgjësimin e kufomës. Ngjarja ndodhi më 10 shkurt, ndërsa u zbulua më 22 shkurt, pas raportimit të Hysen Metës për zhdukjen e babait të tij.
Trupi i Pëllumb Metës, 51 vjeç, u gjet i groposur pranë shtëpisë në Shënavlash të Durrësit. Fillimisht, Hysen Meta pranoi autorësinë e krimit, por më vonë e mohoi atë, ndërsa motra e tij, Hygerta, mori përgjegjësinë, duke pretenduar se e kishte vrarë të atin pasi ai kishte tentuar ta fejonte kundër dëshirës së saj.
Hetimet treguan se pas vrasjes, të tre të rinjtë e groposën trupin në një stallë bagëtish pranë shtëpisë. Kërkimet e policisë, pas denoncimit për zhdukjen e Pëllumb Metës, çuan në gjetjen e trupit dhe të automjetit të tij në zonën e “Sektorit Rinia”.
Gjykata e Durrësit pritet të shqyrtojë këtë çështje të rëndë, ndërsa motivet e krimit mbeten ende të paqarta.
