Pronari i kompanisë “LDA Group”, Kadri Shala, i cili ishte pjesë e e skemës së vjedhjes së 2 milionë eurove të vjedhura në Thesarin e Kosovës, është dorëzuar në polici.
“Para gjysmë ore është dorëzuar vetë në Polici, përkatësisht te njësia për Krime Ekonomike”, ka deklaruar vëllai i Kadri Shalës, Bedri Shala, për mediat në Kosovë.
Biznesmeni Shala, ka sqaruar gjithashtu skemën se në çfarë mënyre kanë përfunduar në llogarinë e kompanisë së tij, shuma e madhe e parave.
“Diku rreth orës 3 kam shkuar në bankomat të TEB Bankës në Prizren për t’i tërhjekur një shumë të mjeteve për nevojat e mija personale nga llogaria e firmës të cilës jam përfaqësues, LDA Group, pasi në llogari kam pasur mjete të mjaftueshme afërsisht 20 000 euro. Në atë moment kam vërejtur se shuma në llogari ishte mbi vlerën të cilën e kam pasur.
Nga ai moment kam menduar se kam pranuar para nga kompanitë me të cilat kam punuar, ose nga përmbaruesit të cilët i kam angazhuar për kompanitë të cilat më kanë obligime”, ka shkruar Shala në letrën e tij drejtuar mediave.
Biznesmeni ka vijuar më tej duke treguar se pasi ka marrë paratë, ka nisur të likujdojë borxhet që u kishte disa personave dhe kompanive.
Shala është shprehur gjithashtu se familjarët nuk kishin dijeni për veprimet e tij dhe u ka kërkuar falje për përfshirjen në këtë ngjarje.
Ndërkohë biznesmeni gjithashtu ka mohuar të ketë ndonjë lidhje me punëtorin e Thesarit Labinot Grudën, i cili u arrestua me dyshimin se ka bërë transaksionin e parave në kompaninë LDA-Group.
Gruda u arrestua nga polica kosovare, pasi në thesarin e shteti u vu re mungesa e 2,077,995.90 eurove. Gjykata vendosi masën e sigurisë “burg pa afat” për punonjësin Labinot Gruda. Ndërkohë vijon të jetë në kërkim është edhe përfaqësuesi i autorizuar i kompanisë “LDA Group”, Valon Shala./GazetaReforma.com/
