Në Kuvend po diskutohet raporti i Institutit për Krimet e Komunizmit.
Deputeti Tomorr Alizoti kërkoi një minutë heshtje për viktimat e komunizmit që ende nuk dihet se ku janë trupat e tyre dhe janë pa varre. “Një minutë heshtje për ata që janë pa varre sepse i vrau komunizmi,” tha Alizoti.
Ministri Taulant Balla e kundërshtoi këtë kërkesë, duke e quajtur “tallje me viktimat”. Ai tha: “Ta fillosh fjalën me ankesën që nuk ka deputetë në sallë dhe ta mbyllësh me kërkesë për një minutë heshtje është tallja më e madhe që mund t’u bësh viktimave. Kjo sallë duhet të jetë plot me 140 vetë, të gjithë në këmbë, me himnin e Flamurit dhe me një minutë të plotë heshtjeje, jo 5 sekonda.”
Balla shtoi se është i gatshëm të dënojë krimet e komunizmit sa herë që ka mundësi, por theksoi se këto krime dënohen kur distancohemi nga ata që kanë përfituar prej tij. Ai kritikoi Alizotin, duke thënë se ai shkon çdo ditë poshtë ballkonit të një “sekretari partie” që ka përfituar nga komunizmi. “Pas 33 vitesh ju keni mundësinë ta largoni komunistin nga kreu i partisë dhe komunizmin nga brenda partisë,” tha Balla.
