Policia që prej mbrëmjes së djeshme ka nisur një aksion blic në disa qytete të vendit, për të goditur rastet e veprimtarisë së lojëra të fatit.
Aksioni ka vijuar deri në orët e para të mëngjesit dhe është shtrirë në disa qytete të Shqipërisë, në Tiranë, Elbasan, Berat, Durrë, Laç, Shkodër, etj.
Mësohet se deri më tani janë arrestuar 50 persona, ndërsa janë shoqëruar 100 të tjerë.
Pjesa më e madhe e të ndaluarve janë administratorë lokalesh.
Gjatë operacionit janë sekuestruar aparate, kompjutera dhe makineri që përdoreshin për të luajtur bixhoz.
Bastet vendosen me celularë online në kompani që ndodhen jashtë vendit dhe paratë qarkullojnë me transferta monetare.
Operacioni nisi pas një hetimi të gjatë nga Prokuroria dhe Krimi Ekonomik.
