Sekretari i Përgjithshëm i Partisë Demokratike, Gazmend Bardhi ka akuzuar kryeministrin Edi Rama se ka braktisur familjet në nevojë dhe të sëmurët, të cilët në këto ditë të vështira kanë nevojë për ndihmë.
Bardhi ka publikuar një video në Facebook ku shihet kryeministri Edi Rama teksa pohon se qeveria nuk ka para për qytetarët në këtë situatë për shkak të COVID-19, ndërkohë që demokrati pohon krejt të kundërtën.
Ai i drejtohet Ramën që të lërë fjalët boshe e mallkimet, por të bëjë detyrën për qytetarët e tij, pasi braktisja e familjeve në nevojë, të sëmurëve apo qytetarëve pa mjetet e nevojshme të jetesës, në këtë kohë krize, është kriminale.
Në këtë linjë, sekretari i Përgjithshëm i PD thekson se buxheti ka para mjaftueshëm për të përballuar krizën, por Shqipëria është në prag të katastrofës ekonomike, sepse lekët e shqiptarëve sipas tij Rama i ka për t’i ndarë me miqtë, në tendera dhe koncesione korruptive.
https://www.facebook.com/1524054689/videos/10221980616334198/
MESAZHI I BARDHIT
Nëse mbyllesh në Surrel nuk ke sesi ta kuptosh që njerëzit janë pa bukë dhe pa asnjë ndihmë nga shteti, prandaj vetëm e mallkon dhe e fyen popullin tënd. Edi Rama duhet të bëjë detyrën dhe të lërë fjalët boshe, teatrin dhe propagandën.
Braktisja e familjeve në nevojë, të sëmurëve apo qytetarëve pa mjetet e nevojshme të jetesës, në këtë kohë krize, është kriminale. Sot qytetarët e pamundur kanë nevojë më shumë se kurrë të ndjejnë solidaritetin dhe mbështetjen e shtetit.
Buxheti ka para mjaftueshëm për të përballuar krizën, por Shqipëria është në prag të katastrofës ekonomike, sepse lekët e shqiptarëve Rama i ka për t’i ndarë me miqtë e tij, në tendera dhe koncesione korruptive.
