KAKAVIJË
Të gjithë shqiptarët që duan të kalojnë në Greqi, duhet që në tokë neutrale të bëjnë një tampon për koronavirusin, përpara se të shkelin në tokën greke.
Kërkimi i testit nga pala greke ka rënduar shumë situatën në kufi.
Radha e automjeteve ka shkuar në më shumë se 5 kilometër, teksa ka nga ata shqiptarë që presin me ditë të tëra, për të kaluar në anën tjetër.
Përveç radhës që krijohet nga bërja e tamponit në kufi dhe plotësimit të një formulari për sigurinë, prej 6 gushtit dogana punon vetëm ditën, pasi nga ora 22:00 deri në orën 06:00 hyrjet dhe daljet e Greqisë janë të mbyllura.
Kurse, duke nisur nga data 16 gusht, situata do të jetë ndryshe, pasi çdo qytetar që do të futet në Greqi, do të izolohet për një javë.
Ministria për Evropën dhe Punët e Jashtme ka reaguar, duke thënë se qytetarët duhet të respektojnë rregullat dhe t’i njohin ato që të mos krijojnë radhë në kufi.
Në pamje, shihet qartë se radha e gjatë është problematike. Kjo edhe për shkak se në automjete ka gra, fëmijë dhe të sëmurë.
