Spanja dhe Kosova nuk kanë marrëdhëniet diplomatike më të mira të mundshme dhe kjo reflektohet edhe në përballjet sportive. Gjatë konferencës për shtyp një ditë para ndeshjes mes dy vendeve, për kualifikueset e Botërorit “Katar 2022”, nuk kanë munguar as momentet e tensionit. Trajneri Bernard Challandes nuk ka paranuar t’i përgjigjet pyetjes së një gazetari deri sa ky i fundit të pranonte të përmendte emrin e Kosovës. Ka qenë gayetari i madrilenes “AS”, Ruben Ares ai që nuk e ka përmendur emrin e Kosovës, deri san ë fund u detyrua ta bënte një gjë të tillë për të marrë përgjigjen. Gjatë kohës që gazetari drejtonte pyetjen ai i referohej Challandes si “trajneri i skuadrës” pa e përmendur emrin e përfaqësueses së Kosovës, ndërsa përkthyesi insiston vazhdimisht që ta përmend emrin.
Challandes nga ana e tij ka vënë në dukje edhe qasjen e mediave të huaja, kryesisht spanjolle, ndaj Kosovës duke thënë se nuk mund ta fsheh faktin se nuk është i lumtur për diçka të tillë.
“Ne nuk mund te jemi te lumtur me qasjen e disa mediave drejtuar Kosovës dhe këtë nuk mund ta fshehim, mirëpo mendoj që motivi kryesor është që do luajmë kundër Spanjës dhe duhet qe të jemi të fokusuar për ndeshjen e nesërme”, ka thënë Challandes.
Kujtojmë që Spanja nuk e njeh Kosovën si shtet i pavarur, lidhur kjo edhe me probleme të brendshme që ata kanë për pavarësinë e Katalonjës.
