Në muajin shkurt të vitit 2019, KPA shkarkoi nga detyra nga detyra prokuroren Antoneta Sevdari, vendim i cili erdhi si pasojë e pasurisë së bashkëshorti të saj.
Ndërkohë që ditën e sotme ish-prokurorja Antoneta Sevdari ka fituar procesin me shtetin shqiptar në Gjykatën e Stasburgut. Në vendimin e Gjykatës thuhet se shkarkimi i Sevdarit ka shkelje proceduriale dhe se shkarkimi nuk ka qenë proporcional. Për pasojë, shtetit shqiptar do duhet ta dëmshpërblejë 24, 600 euro. Më konkretisht, përveç dëmshpërblimit për shkarkimin e padrejtë në vlerën e 13.600 eurove, Sevdari ka fituar edhe 6 mijë euro për dëmin moral të shkaktuar nga procesi si dhe mbulimin e shpenzimeve të aplikimit në Strasburg në shumën 5 mijë euro.
Ishte pasuria e të shoqit që solli edhe shkarkimin e saj, bashkë me denoncimin e një personi të njohur si Aleksandër Marku. Komisioni Publik ankimoi vendimin për pasurinë e bashkëshortit, ndërsa Sevdari e justifikoi me punën e tij jashtë vendi, më konkretisht në Arabinë Saudite.
Sevdari u shpreh se natyra e të ardhurave të tilla, nuk parashtrohet në deklaratat e pasurisë pasi punëdhënësi i tij ka ndërruar jetë. Një tjetër çështje që solli shkarkimit ishte ankimimi i Komisionerit, pasi Sevdari akuzohej se ka pushuar çështjen për një ish-kryetar komune, i cili ka qenë i akuzuar për fshehje pasurie dhe deklarim të rremë. Kujtojmë që Sevdari u shkarkua në vitin 2019 nga trupa e Vettingut ku ishte pjesë edhe Luan Daci. Ish-prokurorja ka deklaruar më parë se u shkarkua nga një gjyqtar që nuk di të shkruajë dhe me një CV-ja “ulëritëse”.
Kujtojmë që pasi u shkarkua nga Kolegji i Posaçëm i Apelimit, prokurorja Antoneta Sevdari shkruajti një letër të hapur ku shprehu indinjatën, shqetësimin e thellë, por dhe arsyet e forta për të dyshuar nëse procesi i Vetting-ut po i shërben qëllimit.
Në letrën e saj, Sevdari paralajmëroi se nuk do të heqë dorë dhe se do vazhdojë protestën.
“Unë isha, jam dhe do të mbetem një prokurore krenare. Beteja ime nuk përfundon këtu. Unë jam betuar solemnisht t’Ju shërbej dhe do ta bëj këtë, edhe më e fuqishme, edhe më e guximshme!” Duke gjykuar nga rasti im, kam arsye të forta për të dyshuar nëse procesi i Vetting-ut po i shërben qëllimit, i cili unë besoj se është: “Largimi i prokurorëve dhe gjyqtarëve të korruptuar dhe profesionalisht të paaftë dhe sigurimi i kushteve që prokurorët dhe gjyqtarët me integritet dhe profesionalisht kompetentë të vazhdojnë t’i shërbejnë drejtësisë shqiptare ashtu siç kanë bërë deri tani”- shkruante ndër të tjera Sevdari. /Gazeta Reforma
