Lëvizja Vetëvendosje ka vendosur të propozojë Glauk Konjufcën si mandatar për kryeministër të Kosovës. Lajmin e bëri të ditur vetë kryetari i partisë, Albin Kurti, gjatë mbledhjes së Këshillit të Përgjithshëm të LVV-së.
“Unë marr vendin e Glaukut, e ai timin, siç jemi dakorduar bashkë mbërmë”, deklaroi Kurti, duke iu referuar postit të zëvendëskryeministrit dhe ministrit të Jashtëm dhe Diasporës që më herët ishte parashikuar për Konjufcën në kabinetin e propozuar më 26 tetor, por që nuk mori mbështetjen e Kuvendit të Kosovës.
Mbledhja e LVV-së u zhvillua një ditë para përfundimit të afatit 10-ditor të dhënë nga presidentja Vjosa Osmani për mandatarin që do të formojë Qeverinë e re ose për shpalljen e zgjedhjeve të reja.
Kreu i Lidhjes Demokratike të Kosovës, Lumir Abdixhiku, reagoi ashpër ndaj këtij vendimi, duke e quajtur mbledhjen e LVV-së “një shfaqje teatrale” dhe duke e cilësuar Konjufcën si “mandatar pa numra, pa shumicë e pa legjitimitet demokratik”.
“Dua të besoj se presidentja e Republikës do të respektojë vullnetin e shumicës shqiptare, para mbledhjeve propaganduese të partive me mandatarë plot, por pa shumicë parlamentare”, shkroi Abdixhiku në Facebook.
Më 31 tetor, presidentja Osmani zhvilloi takime me përfaqësuesit e partive politike për të diskutuar rreth çështjes së mandatarit dhe mundësisë për zgjedhje. LDK, PDK dhe AAK argumentuan se nuk ekziston shumicë parlamentare dhe se zgjedhjet janë alternativa e vetme. Albin Kurti, nga ana e tij, nuk u prononcua për media.
Pas takimeve, Osmani deklaroi se Kurti i kishte kërkuar një takim para datës 5 nëntor – kur përfundon afati 10-ditor – për të vlerësuar nëse ekziston mundësia për të formuar shumicën parlamentare.
