Një grup studiuesish në Universitetin e Oksfordit ka mbledhur të dhëna nga 180 shtete të ndryshme për të analizuar politikat dhe masat e marra për të menaxhuar krizën e koronavirusit.
Studiuesit në analizën e tyre janë bazuar në 17 tregues dhe kanë zhvilluar një indeks përgjigjeje ndaj Covid-19.
Gjetjet e tyre ata i ndanë në katër grupe:përgjigja e përgjithshme e qeverisë, mbështetja ekonomike, frenimi i përhapjes dhe shëndeti dhe rreptësia e masave.
Grupi i fundit përllogarit ashpërsinë e masave të vendosura gjatë pandemisë dhe synon të hedhë dritë mbi debatin nëse masat e marra nga qeveritë e vendeve të ndryshme kanë qenë të duhura.
Kësisoj Kosova rezulton në krye të listës së masave të marra në Evropë me një rezultat prej 69.44 nga 100 ndërsa Bjellorusia dhe Gjeorgjia janë dy vendet me rezultatin më të ulët, 8.33 nga 100.
Ndërkohë Shqipëria ka një rezultat prej 53.7 nga 100 pikë maksimale, renditet para Italisë, Francës, Zvicrës, Holandës, Austrisë, Çekisë, Polonisë, Serbisë, Kroacisë, Hungarisë dhe Bullgarisë.
Nga vendet e Bashkimin Evropian, Portugalia kryeson me rezultatin e përgjithshëm prej 66.2 100, ndërsa Estonia dhe Lituania janë në vendin e fundit (19,44 / 100).
Si është përllogaritur indeksi?
“Ne shënojmë prezencën e rregullave të vendosura gjatë pandemisë”, shpjegon për Euronews Dr Anna Petherick, pedagoge dhe një prej autoreve të këtij studimi.
Për të matur rreptësinë e masave, ekipi ka shënuar 9 indekse: mbyllja e shkollave dhe vendeve të punës, transporti, kufizimet mbi lëvizjet, udhëtimet e grumbullimet si dhe fushatat për informimin publik.
Në studim janë rreth 290 kontribuues të cilët përditësojnë shifrat sipas të dhënave të publikuara nga autoritetet përkatëse.
Autorët e studimit thonë se qëllimi nuk është matja e efektivitetit të politikave të kontrollit , pasi situatat mund të ndryshojnë shumë nga një vend në tjetrin dhe numri i rasteve të regjistruara varet nga sasia e testimeve të kryera, por ka të bëjë me dhënien e një kontributi në këtë situatë pandemie.
