Vazhdon masakra në lumin Mat: Ish-deputeti socialist zapton 22 km të shtratit, por ministria e Mjedisit hesht!

Duket se çështje më të rëndësishme pë qeverinë kanë bërë që mjedisi të kalojë në një temë të dorës së dytë, që jo vetëm nuk po merr vëmendjen që i takon, por po shfrytëzohet pa kriter.

Disa ditë më parë u publikuan disa pamje nga lumi Mat, në shtratin e të cilit, kompania “Salillari” po kryen punime, ku shihen kamionët dhe ekskavatorët e kompanisë Salillari.

Gërryerja në shtratin e këtij lumi për të marrë rërë dhe zhavor ka bërë që rrjedha e tij të devijohet, duke shkaktuar edhe eriozion në tokat bujqësore të banorëve të kësaj zone, duke sjellë sërish rrezikun e përmbytjeve në dimër.

Teksa, qeveria iu bën thirrje shqiptarëve të qëndrojnë brenda duke shmangur grumbullimet e shumta, shumë kompani po ushtrojnë veprimtarinë e tyre pa kriter në terren, duke shmangur edhe protestat e qytetarëve.

LEXO: Premtimet në raport të kundërt me realitetin! Salillari dhe Gjikuria ‘gllabërojnë’ malet e lumenjtë 

Mirëpo, masakra mbi lumin Mat vijon e këtë herë po kontribuon edhe Ndue Kola, ish-deputet i Partisë Socialiste.

Janë rreth 15 skrepa të firmës “A.N.K.” dhe firmës “Bardhi Konstruksion”, që kanë shqyer e po vazhdojnë të shqyejnë 22 kilometër shtrat të lumit Mat, në 6 zona me 12 qëndra nxjerrje zhavorr e rërë.

Kompania nuk është e pajisur as me leje shfrytëzimi e as me leje mjedisore, teksa Ligji nr. 111 datë 15.11.2012, ndalon shfrytëzimin e shtretërve të lumenjve për 30 vite.

Volumet që janë shkulur nga lumi Mat, janë më të larta se kodrinat e zonës Fan-Rubik-Milot-Shënkoll, madje buzë rrugës kryesore, ka krijuar disa varg-male në afro 4 kilometër gjatësi, 1 kilometër gjerësi e 20-30 metër lartësi.

Sipas Komitetit të Baseneve Ujore, Drejtorisë së Baseneve të lumit Mat me qëndër në Lezhë dhe Agjencisë Kombëtare të Mjedisit që prej 3 janarit 2014; në Shqipëri nuk është dhënë asnjë leje, për nxjerrje inertesh në shtretërit e lumenjve.

Madje, janë revokuar edhe 1139 lejet, që ishin dhënë me afat deri më 31 dhjetor 2021; ku firma e Ndue Kola kishte 37 leje nga lumi Tapizë-Tiranë, në lumin Ishëm, lumin Zezë në Fushë Krujë e deri në Klos-Burrel.

Pyetja që lind në këtë rast është se kur ligji e ndalon një veprim të tillë, si është mundur që Ndue Kola, vazhdon gërryen dhe shkatërron shtratin e lumit Mat?

A ka ai një leje për të kryer një veprimtari të tillë dhe nëse po ku e ka marrë, kur prej 3 janarit 2014, nuk është dhënë asnjë leje dhe nuk ka asnjë leje të vjetër në fuqi; sepse janë revokuar me Ligjin Ligjin nr. 111, datë 15.11.2012?