Krimi mjedisor i firmës së ndërtimit në Mjull Bathore është ende duke vazhduar. Pavarësisht denoncimit që u bë ditën e djeshme në media për krimin që po bën kjo kompani, ende nuk është marrë asnjë masë nga instancat shtetërore.
Toka të tëra po përmbyten nga dherat që firma e Bektashit hedh vend e pa vend, duke mbushur periferinë e Tiranës me male inertesh. Një prej vendeve të depozitimeve të paligjshme që kjo kompani po përdor, është periferia e Tiranës zona e quajtur Mjull Bathore.
Joq shkruan se: Jo vetëm gjatë natës, por dhe gjatë ditës qindra ton dherash shkarkohen në këtë zonë nga makinat e rënda që për nga numri i tyre janë kthyer në autokolonë.
Pluhuri, dherat po mbysin çdo gjë. “Megjithëse kemi marrë në telefon disa herë policinë për të parë se çfarë po ndodh, ata nuk vijnë duke na braktisur të parët”, thotë një zotëri i moshuar.
Ky krim i kompanisë së ndërtimit ‘Kontakt’, e cila në mes të ditës krijon male me dhera, duket se gëzon mbrojtjen e shtetit.
Raste të tilla “krimesh” ku banorët duhet të mbyllin gojën përballë masakrës mjedisore nuk kanë të ndalur.
Ndërtuesi që ushtron aktivitetin e tij në Tiranë është duke ngritur kompleksin “Mangalem” në zonën e Ali Demit. Pasi nxjerr dheun nga themelet mbush makinat e tonazhit të rëndë dhe i dërgon ato përgjatë rrugës së Sanatoriumit, duke përfunduar në Mjull Bathore.
Nuk dihet ende se kush do të ndalojë këtë masakër mjedisore dhe a do të ndëshkohet ndokush, por dihet që kompania e ndërtimit “Kontakt” po kryen një vepër penale në mes të banorëve dhe në mes të Tiranës ditën me diell duke vrarë mjedisin e përbashkët./JOQ
Ditën e djeshme portali “Dosja.al” shkruante se firma e ndërtimit “Kontakt”, po ndërton kompleksin gjigand “Mangalem” në zonën e Ali Demit dhe prej disa muajsh gërmon themelet.
Mbetjet e ndërtimeve dhe mijëra ton inerte i depoziton në zona të jashtëligjshme. Ky ndërtues ka mbushur për një kohë të shkurtër pothuajse të gjithë periferinë e Tiranës me inerte duke shkaktuar një katastrofë ekologjike dhe mjedisore. Ajo kishte edhe një video ku shikohej kamionë që shkarkonin mbetje duke shkaktuar një dëm të madh mjedisor.
Banorët e kësaj zone shpesh herë janë ankuar në media duke dërguar foto dhe video sesi makinat e tonazhit të rëndë të mbushur me dhera bëjnë çdo ditë rrugën nga “Ali Demi” në Sanatorium dhe mbërrijnë në fshatin Mjull Bathore.
