Në Gjirokastër vijojnë me intensitet kontrollet në fermat dhe tufat e bagëtive të imta, pas shfaqjes së vatrës së parë të murtajës së ruminantëve të vegjël në këtë zonë.
Këtë javë, sëmundja u konfirmua në një fermë në Libohovë, ku janë karantinuar 256 krerë bagëti dhe po ndiqet me kujdes gjendja e tyre shëndetësore.
Përveç kësaj, veterinerët kanë forcuar kontrollet epidemiologjike edhe në tufat e tjera që mbarështrohen në të gjithë qarkun.
Flora Zharkalli, përgjegjëse e sektorit veterinar, shpjegoi se janë përcaktuar dy zona kontrolli: një zonë brenda 3 kilometrave, që përfshin vetëm bashkinë Libohovë, qytetin dhe fshatin Nepravishtë, dhe një zonë më të gjerë deri në 10 kilometra, ku përfshihen edhe Pogoni, Dropulli, disa fshatra të komunës Antigonë dhe Lazarati.
Ajo nënvizoi se monitorimi i sëmundjes është i vazhdueshëm, pasi murtaja mund të jetë edhe në formë subklinike dhe kërkon ndjekje të përditshme për të paktën 10 ditë.
Murtaja e ruminantëve të vegjël është një sëmundje virale shumë ngjitëse që prek kryesisht delet dhe dhitë, duke shkaktuar dëme të mëdha në sektorin e blegtorisë. Bashkëpunimi me laboratorin e Sigurisë Ushqimore dhe Veterinare në Tiranë është vendimtar për identifikimin dhe trajtimin e çdo rasti të dyshuar.
Në Shqipëri janë regjistruar deri tani 11 vatra të kësaj sëmundjeje në qarqe të ndryshme si Shkodër, Dibër, Bulqizë, Tiranë, Korçë, Devoll, Skrapar, Lushnjë dhe Gjirokastër, me gjithsej 13 ferma të prekur dhe mbi 1300 bagëti të asgjesuara. Megjithë masat parandaluese të marra, si ndalimi i tregtisë së gjësë së gjallë dhe kufizimi i kullotave, përhapja e murtajës vijon me shpejtësi.
Veterinarët bëjnë apel për bashkëpunim të plotë nga fermerët, duke kërkuar që çdo rast i dyshuar të raportohet menjëherë për të mundësuar izolimin dhe trajtimin e duhur në kohë.
Ndërkaq, Ministria e Bujqësisë ka dhënë deri tani vetëm udhëzime për parandalimin, por nuk ka sqaruar nëse do të ketë dëmshpërblime për fermerët e prekur.
Përhapja e murtajës në vend ka lidhje me futjen kontrabandë të kafshëve nga Rumania, të cilat kanë ardhur me certifikata të falsifikuara. Dështimi i kontrolleve veterinare në dogana dhe tregje ka favorizuar shpërndarjen e sëmundjes në disa rajone të vendit.
