Nënkryetari i LSI, Petrit Vasili deklaroi se Spitali i Fierit ishte projekt i gatshëm që në vitin 2014 por u shty deri tani për shkak të fushatës elektorale.
Në një deklaratë për media, Vasili tha se për këtë projekt u pagua disa qindra mijëra euro dhe prezantimi është bërë në prani të kryetarit të tanishëm të bashkisë, Armado Subashi.
Ai theksoi se “është një faqe e zezë për ata që përfaqësojnë qarkun e Fierit, në mënyrë të veçantë kryetarin e Kuvendit të Shqipërisë, që ndodhet atje në krah të tij dhe në vend të vinte duart në kokë që Fieri katandoset, rrinë e duartrokasin si shvejkër, për një copë mandat të qelbur deputeti.”
Pjesë nga deklarta:
Praktikisht, projekti i spitalit të Fierit është paguar disa qindra mijëra euro po do keni mundësi të shikoni dhe në foto fakte konkrete vite më parë dhe është prezantuar që në vitin 2014. Ky është projekti, ky do duhej të ishte spitali i Fierit me 200 e ca shtretër. Është prezantuar në 4 dhjetor të vitit 2014. Fiksojeni mirë të nderuar qytetarë dhe mos i harroni këto gjëra. Ja këtu keni dhe prezantimin në dhjetor. Në prani të deputetit Subashi që sot është dhe kryetar bashkie.
U premtua që në 2014 dhe u paguan qindra mijëra euro dhe u premtua e keni në faqen zyrtare të Spitalit të Fierit dhe do fillonin punimet në vitin 2015.
Asnjë nga ju nuk ka harruar që jemi në viti 2021 dhe meqë jemi në prag të fushatës elektorale tani u kujtua Edi Rama për spitalin.
Veç të tjerave ju keni mundësi të ndiqni dhe premtimet publike. Një video shumë të shkurtër ku kryetari i bashkisë Armando Subashi premton që do të fillojë në fund të 2016 dhe njëherazi do të ndërtohej dhe një universitet mjekësie në Fier”, ka thënë Vasili.
