Gjatë vitit 2024 është shënuar një rritje e ndjeshme e numrit të fëmijëve të vaksinuar me vaksinën MMR (kundër fruthit, shytave dhe rubeolës) në grupmoshat 1 dhe 5 vjeç.
Sipas të dhënave të publikuara nga Organizata Botërore e Shëndetësisë, 84% e fëmijëve morën dozën e parë të vaksinës, ndërsa 76% kanë marrë edhe dozën e dytë.
Ekspertët shëndetësorë theksojnë se në krahasim me një vit më parë, janë vaksinuar 2 milionë fëmijë më shumë, por mbulimi vaksinor mbetet ende larg pragut prej 95% që nevojitet për të parandaluar shpërthime epidemike të fruthit.
Megjithëse ka përmirësim, mbi 30 milionë fëmijë në mbarë botën vazhdojnë të mbeten të pavaksinuar, ndërkohë që 60 shtete kanë raportuar shpërthime të konsiderueshme të fruthit.
OBSH nënvizon gjithashtu se 14.3 milionë fëmijë nuk kanë marrë asnjë dozë vaksine, shumica prej të cilëve jetojnë në zona të prekura nga krizat humanitare, ku qasja në shërbime shëndetësore mbetet e kufizuar.
