Pas Shqipërisë, edhe Kosova mund të marrë ndihmë për çështjen e vaksinimit të popullatës kundër koronavirusit edhe nga shteti fqinj, Serbia.
Të paktën kjo është kërkuar nga Komiteti i Bashkimit Europian, i cili i ka bërë thirrje Kosovës dhe Serbisë që të bashkëpunojnë në këtë çështje.
“Ne jemi duke ndjekur zhvillimet dhe duke i shikuar raportet për këto zhvillime që kanë të bëjnë me shpërndarjen e vaksinave.
Autoritetet në Serbi dhe në Kosovë duhet të bashkëpunojnë ngushtë në përputhje me aranzhimet relevante nga dialogu për lëvizjen e mallrave dhe certifikimin e prodhimeve farmaceutike”, ka thënë në një përgjigje me shkrim, zëdhënës i BE-së për çështje të jashtme dhe siguri, Peter Stano.
Kujtojmë se pak ditë më parë Serbia nisi procesin e vaksinimit të Covid-19 në Veri të Kosovës ku përfituan qytetarë serbë që jetojnë në këtë zonë.
Ndërkohë Ministri aktual i Shëndetësisë në Kosovë, Armend Zemaj, deklaroi se ka nënshkruar aplikimin zyrtar për sigurimin e vaksinës kundër COVID-19 nëpërmjet Aleancës Botërore të vaksinimit.
Nga kjo sipas ministrisë së Shëndetësisë, Kosova pritet të përfitojë rreth 360 mijë vaksina falas, ndërsa pjesën tjetër synon ta blejë.
Sipas ministrisë, me këtë sasi pritet që të vaksinohen së pari grupet e popullatës që janë më të rrezikuara nga COVID-19, siç janë punonjësit e shëndetësisë, të moshuarit dhe personat me sëmundje kronike./Gazetareforma.com/
