Policia e Durrësit ka arrestuar tre persona në kuadër të operacionit “Last Threat”, të dyshuar për përfshirje në veprimtari kriminale që përfshin prostitucionin, shantazhin dhe trafikimin e lëndëve narkotike.
Në pranga ranë Alma Hysa, 49 vjeçe nga Spitalla, e cila akuzohet se ushtronte prostitucion në banesën e saj, si dhe Robert Lamnica, 40 vjeç nga Shënavlashi, i cili bashkëpunonte me të për të kërcënuar klientët pas marrëdhënieve seksuale.
Ata i kërkonin para nën kërcënimin e thikës, ndërkohë që Lamnica u bënte fotografi intime klientëve dhe i shantazhonte për të marrë shuma të mëdha parash.
Sipas Policisë, një prej rasteve të zbuluara është ai i shtetasit F. Ç., i cili është mashtruar nga Hysa dhe më pas është kërcënuar nga Lamnica për t’i dorëzuar 65.000 lekë.
Gjatë arrestimit të Lamnicës, policia ndaloi edhe një të ri 21-vjeçar, Armand Hysa, i cili ndodhej në shoqërinë e tij. Gjatë kontrollit fizik, atij iu gjet një sasi kokaine e ndarë në doza, e gatshme për shitje.
Policia po punon në bashkëpunim me Prokurorinë për të identifikuar klientët e tjerë të kërcënuar dhe për të dokumentuar të plotë rrjetin kriminal.
Materialet i janë referuar Prokurorisë për veprat penale “Shtrëngimi me anë të kanosjes ose dhunës për dhënien e pasurisë”, “Prostitucioni” dhe “Prodhimi dhe shitja e narkotikëve”.
