Krijimi dhe mbështetja e Prokurorisë së Posaçme është përdorur vazhdimisht si mjet propagande nga kryeministri Edi Rama.
SPAK me punën e tij deri më tani ka çuar në qeli disa nga njerëzit më të besuar të Ramës, ku përmendim Saimir Tahirin, Vangjush Dakon dhe Arben Ahmetaj, ku ky i fundit është ende në arrati
Teksa SPAK ka bërë lëvizje të guximshme duke shigjetuar ‘koka’ të politikës në vend, kryeministri Edi Rama duket se është penduar për krijimin e Prokurorisë së Posaçme.
Burime brenda mazhorancës bëjnë me dije se Rama po diskuton një projekt për t’i “lidhur duart” Prokurorisë së Posaçme, nëpërmjet ndryshimeve ligjore.
Konkretisht ndryshimet do të bëhen në Kodin Penal, ku po planifikohet të hiqet vepra penale “shpërdorim detyre”, duke kufizuar mundësitë e prokurorëve të SPAK për ndjekjen penale ndaj zyrtarëve të lartë dhe punonjësve të administratës. Heqja e “shpërdorimit të detyrës” si vepër penale do ta vështirësonte punën e SPAK në maksimum.
Të njëjtat burime shprehen se Rama kërkon të ndjekë shembullin e Italisë.
Duke marrë parasysh marrëdhënien e tij me kryeministren Meloni, ka shumë mundësi që këtë opsion ia ka sugjeruar homologia e tij, ndaj së cilës u tregua bujar me marrëveshjen për regjugjatët.
Kujtojmë që qeveria italiane miratoi reformën e re në drejtësi pak muaj më parë, ku parashikohet ndalimi i përgjimeve, teksa parashikohet se “shpërdorimi i detyrës” nuk do të jetë më një krim. Gjithashtu gjyqtarët nuk do të jenë më në gjendje të japin urdhër për arrestimin e zyrtarëve pa i pyetur më parë ata.
