Ushtarët shqiptarë që janë pjesë e Forcave të Armatosura dhe që shërbejnë në misionin paqeruajtës të KFOR në Kosovë, do të marrin 120 mijë lekë të vjetra në ditë për angazhimin e tyre, veç pagës mujore.
Me anë të një një VKM-je, qeveria shqiptare ka miratuar sot disa ndryshime që ka bërë në vendimin e vitit 2024 “Për pjesëmarrjen e Forcave të Armatosura të Republikës së Shqipërisë në operacionin ushtarak ndërkombëtar KFOR, Kosovë”.
Kjo vjen pas vendimit të Këshillit të Ministrave, i cili ka vendosur shtyrën e kohëzgjatjes së angazhimit të trupave shqiptare në këtë mision, nga 31 dhjetori 2024 që është aktualisht, deri në 31 dhjetor 2027.
Efektet financiare, që rrjedhin nga zbatimi i këtij vendimi, do përballohen nga buxheti i Ministrisë së Mbrojtjes.
Njoftimi:
DISA NDRYSHIME NË VENDIMIN NR.910, DATË 22.12.2014, TË KËSHILLIT TË MINISTRAVE, “PËR PJESËMARRJEN E FORCAVE TË ARMATOSURA TË REPUBLIKËS SË SHQIPËRISË NË OPERACIONIN USHTARAK NDËRKOMBËTAR KFOR, KOSOVË”, TË NDRYSHUAR
Në mbështetje të nenit 100 të Kushtetutës, të nenit 7, të ligjit nr.9363, datë 24.3.2005, “Për dërgimin e Forcave të Armatosura të Republikës së Shqipërisë jashtë vendit, si dhe për mënyrën e procedurat e vendosjes dhe kalimit të forcave ushtarake të huaja në territorin e Republikës së Shqipërisë”, të ndryshuar, dhe të shkronjës “ç”, të nenit 11, të ligjit nr.64/2014, “Për pushtetet dhe autoritetet e drejtimit e të komandimit të Forcave të Armatosura të Republikës së Shqipërisë”, të ndryshuar, me propozimin e ministrit të Mbrojtjes, Këshilli i Ministrave
V E N D O S I:
Në vendimin nr.910, datë 22.12.2014, të Këshillit të Ministrave, “Për pjesëmarrjen e Forcave të Armatosura të Republikës së Shqipërisë në operacionin ushtarak ndërkombëtar KFOR, Kosovë”, të ndryshuar, bëhen ndryshimet, si më poshtë vijon:
- a) Në pikën 4, togfjalëshi “… 31 dhjetor 2024 …” zëvendësohet me “… 31 dhjetor 2027 …”;
- b) Në shkronjën “a”, të pikës 5, togfjalëshi “… në masën 6 000 (gjashtë mijë) lekë …” zëvendësohet me “… në masën 12 000 (dymbëdhjetë mijë) …”.
Efektet financiare, që rrjedhin nga zbatimi i këtij vendimi, përballohen nga buxheti i Ministrisë së Mbrojtjes.
Ngarkohet ministri i Mbrojtjes për zbatimin e këtij vendimi.
Ky vendim hyn në fuqi menjëherë dhe botohet në “Fletoren zyrtare”.
K R Y E M I N I S T R I
Forca e Kosovës (KFOR) është një forcë paqeruajtëse ndërkombëtare e udhëhequr nga NATO në Kosovë. Operacionet e saj po zvogëlohen gradualisht derisa Forca e Sigurisë së Kosovës, e themeluar në vitin 2009, të bëhet plotësisht e aftë të kontrollojë territorin e vendit.
Aktualisht, 27 shtete kontribuojnë në KFOR, me një forcë të kombinuar prej rreth 3,800 personelit ushtarak.
