Pas konstatimit të dëmtimeve serioze në strukturën mbajtëse, ura e Milotit është mbyllur për qarkullimin deri në marrjen e masave emergjente dhe përgatitjen e një zgjidhjeje afatgjatë.
Vendimi u mor pas inspektimit në terren nga Autoriteti Rrugor Shqiptar, zëvendësministri i Infrastrukturës dhe një grup ekspertësh të Universitetit Politeknik të Tiranës dhe Institutit të Ndërtimit.
Sipas autoriteteve, ura, e gjatë 788 metra, paraqet rrezik real për shembje, për shkak të dëmtimeve në themelet e saj të shkaktuara nga erozioni dhe shfrytëzimi i pakontrolluar i shtratit të lumit Mat për materiale ndërtimi.
Për të shmangur pasoja të rënda, është urdhëruar pezullimi i menjëhershëm i qarkullimit dhe devijimi i tij drejt itinerareve alternative.
Shefi i Qarkullimit Rrugor në Lezhë, Valmir Nikolli, konfirmoi se vendimi për mbylljen është marrë për të garantuar sigurinë publike dhe se Policia Rrugore po monitoron situatën për të lehtësuar trafikun në rrugët dytësore.
Ndërhyrja teknike emergjente do të nisë në ditët në vijim, në bashkëpunim me strukturat inxhinierike vendase. Në planin afatgjatë, parashikohet ndërtimi i një ure të re, si pjesë e programit kombëtar “100 Ura”, një nismë e mbështetur nga Banka Botërore për të zëvendësuar infrastrukturën rrugore të amortizuar dhe për të garantuar siguri në nyjet më të rëndësishme të qarkullimit kombëtar.
Autoriteti Rrugor thekson se ura do të qëndrojë e mbyllur derisa të eliminohet çdo rrezik për përdoruesit e saj.
