Ministri i Shëndetësisë në Kosovë, Armend Zemaj ka deklaruar ditën e sotme se vaksina kundër koronavirusit do të jetë falas për qytetarët në Kosovë.
Ministri Zemaj tha se Qeveria e Kosovës është në rrugën e duhur për sigurimin vaksinave kundër COVID-19.
Më tej ai tha se pavarësisht çmimit apo mënyrës sesi ajo vaksinë do të mbërrijë te qytetarët kosovarë, ata do të vaksinohen falas.
“Jemi në hapa konkret dhe që mendojmë të realizueshëm nëse vaksina hidhet në përdorim që edhe ne ta sigurojmë për të gjithë qytetarët e Republikës së Kosovës…. Tash mbetët një vlerësim i yni në të dy rrugët. Unë si ministër i Shëndetësisë obligohem dhe zotohem që duhet të siguroj për gjithë qytetarët e mi, pavarësisht çmimit apo mënyrës, se si të arrij që ajo vaksinë të jetë për qytetarët e Republikës së Kosovës…. Unë do t’i vaksinoj falas”, është shprehur Zemaj.
Ndërkohë në lidhje me pagën shtesë për punonjësit shëndetësor, Zemaj tha që kjo do të vazhdojë deri në fund të pandemisë.
“I gjithë personeli shëndetësor që është në listat zyrtare të pagave në Republikën e Kosovës do të ketë pagën shtesë deri në përfundim të pandemisë. Përshkallëzimi do të jetë edhe në aspektin profesional por edhe të angazhimit të drejtpërdrejtë në luftimin e pandemisë COVID-19, por jo me një dallim të theksuar”, ka deklaruar ministri.
