Menaxhimi i mbetjeve urbane ka qenë prej kohësh një problem thuajse në çdo qytet të Shqipërisë. Sot në Kuvend, kryeministri Edi Rama paralajmëroi “dorë të hekurt” për Bashkitë që nuk pastrojnë dhe menaxhojnë plehrat, duke thënë se nuk do të përfitojnë asnjë lloj granti.
“Duke nisur nga projektbuxheti i vitit në vijim do të vendosë një parim të panegociueshëm me shpërndarjen e fondeve për bashkitë: Në fillim pastërtia pastaj gjërat e tjera. Rritja e konsumit e veprimtarisë e turizimit nuk mund të shoqërohen me rritjen e papastërtisë. Bashkitë që nuk pastrojnë dhe nuk menaxhojnë plehrat nuk përfitojnë asnjë lloj granti të pakushtëzuar nga buxheti. Asnjë investim i ri nuk i vlen komunitetit që nuk i garantohet pastërtia e pastërtia duhet të kthehet në kryefjalë të çdo kryebashkiaku”, tha Rama në foltore.
Ajo që kryeministri Edi Rama harroi të thonte, është se në çdo rast janë qytetarët ata që do të paguajnë. Siç ka ndodhur shpesh, menaxhimi i mbetjeve ka mbetur në duart e të paaftëve që janë emëruar falë partisë, apo me keq akoma në duart e kriminelëve. E si pasojë dëmet në mjedis janë të pakompesueshme, pasi menaxhimi i mbetjeve, bëhet në mënyrën që kushton më pak; djegia nëpër inceneratorë.
Presioni i Ramës nuk bie mbi kryebashkiakët, pjesa më e madhe e të cilëve janë zgjedhur pa një kundërshtar përballë. Duke u justifikuar me menaxhimin e mbetjeve, qytetarët do të mbeten pa shërbime të tjera, pasi paratë do të shkojnë aty ku luhen interest më të mëdha.
Ndryshe nga ç’ndodh në vendet e tjera, ku inceneratorët janë thuajse të gjitha në pronësi të institucioneve shtetërore apo kompanive bashkiake (Italia p.sh.), në Shqipëri ato janë pronë e njerëzve me sfond të paqartë kriminal dhe me lidhje të forta me politikën.
Përpos të tjerave, edhe BE është deklaruar kundër djegies së plehrave në inceneratorë, duke thënë se rrit kostot dhe bie ndesh me parimet e BE, dhe nga ana tjetër mbështeti ricikilimin.
Ndër të tjera, para dy vitesh KLSH zbuloi se defektet në kontratën e inceneratorit të Tiranës do i kushtonin qytetarëve edhe 104 milionë euro shtesë, 27% më shumë se kostoja fillestare.
Ndërkohë në Fier, inceneratori ka qenë inekzistent deri tani dhe djegia e mbetjeve në fushë të hapur gjatë muajit korrik shkaktoi një ndotje të madhe në gjithë qytetin dhe era e keqe që u përhap nga tymi, e vështirësoi edhe më shumë përditshmërinë e qytetarëve.
Pavarësisht këtyre, qeveria nuk ka marrë asnjëherë përgjegjësi për shkeljet e dy mandateve të para që vazhdojnë hapur çdo ditë, ndërsa tashmë në mënyrë të tërthortë, kryeministri Rama e bën të ditur se kjo gjë do të vazhdojë.
